Deputatdan Qorbaçova edam tələbi: hamı bilməlidir ki, xalqımızla zarafat etmək olmaz
İndiki deputat Qorbaçova ölüm hökmü çıxarıb
20 Yanvar hadisələrindən dərhal sonra həmin vaxt İsmayıllıda məhkəmə sədri olan, indi isə Milli Məclisin deputatı kimi fəaliyyət göstərən Tahir Kərimli SSRİ-nin o vaxtki Prezidenti Mixail Qorbaçov haqqında ölüm hökm çıxarıb. Bəlkə də bu, postsovet məkanında yeganə hadisədir, bunu çox adam bilmir. Onun haqqında qəti hökm çıxarmışdı. Aydınıydı ki, icrası mümkün deyil, amma 20 Yanvar hadisələrinə münasibət bildirilmişdi. Bunu Sonxeber.az-a Milli Məclisin deputatı Fərəc Quliyev 20 Yanvar hadisələrinə görə Azərbaycan tərəfinin indiyədək M. Qorbaçovun məhkəməsini keçirərək ona hökm oxumaması məsələsinə münasibət bildirərkən deyib.
İmperiyaya verilən ən böyük cəza xalqların azadlığıdır
Millət vəkili xatırladıb ki, sovet rejimi, imperiyası 20 Yanvar hadisələrinə qədər bir sıra yerlərdə qan tökmüşdü: "60-cı illərdə Macarıstanda, Polşada, Çexoslavakiyada törətdiyi hadisələri, 80-ci illərdə Qazaxıstanda törətdiyi qırğınları, 1990-cı ildə isə Litva və Gürcüstanda buna bənzər hadisələri göstərmək olar. Bu, Sovet imperiyasının mahiyyətiydi. Bütün imperiyalarda bu cür davranışlar olub, əslində onların ən böyük cəzası isə əsarətdə saxladıqları xalqların azadlığa çıxmasıdır".
Hamı o şəhidlərə həsəd aparır
F. Quliyevin sözləinə görə, Azərbaycan xalqı da Sovet imperiyasına ən böyük təpkini göstərərək ondan ayrıldı: "Düzdü, bu proses qanlı oldu, 20 Yanvarda şəhidlər verdik, amma azadlığı da qansız əldə etmək mümkün deyil, bu, bir şərəf işidir. Hamımız dünyamızı dəyişəcəyik, ancaq o şəhidlər yaxşı mənada barmaqla göstərilən, bəlkə də hamı tərəfindən həsəd aparılan şəhidlərimizdir. İmperiyaya verdiyimiz ən böyük cəza budur".
İlk sərəncamım Qorbaçovun "infazı" olacaq
Deputat hesab edir ki, Azərbaycana qarşı törədilmiş belə hadisələr zamanı, istəyir Xocalı soyqırımı, istərsə də 20 Yanvar hadiəsi olsun, belə məsələlərdə susqunluq olmamalıdır: " Mən sonuncu prezident seçkilərində namizəd olarkən qeyd etmişdim ki, prezident olacağım təqdirdə ilk sərəncamım Xocalı və 20 Yanvar hadisələrini törətmiş istənilən məmurların, istər bu, Ermənistan, istərsə də SSRİ rəhbərliyində olsun, onların dərhal "infaz" olunmasından (ölüm cəzası) ibarət olacaq. Belə bir nümunə var. İsrailin idmançıları 1972-ci il Mühnen Olimpiya Oyunlarında qətlə yetiriləndə bu ölkənin Baş naziri sərəncam verdi və terrorçular dünyanın hansı yerində yerləşməsindən asılı olmayaraq, dərhal öldürüldü".
Hamı başa düşərdi ki, Azərbaycan xalqı ilə zarafat etmək olmaz
F. Quliyevin fikrincə, Azərbaycan tərəfindən belə bir hərəkətlər olardısa, o vaxt və ya indiki dövrdə bu cür hərəkətlər olardısa, hər kəs Azərbaycan xalqı barədə düşünərdi ki, bu xalqla zarafat etmək olmaz, onun mənliyinə, azadlığına toxunanda, ona qarşı zorakılıq olanda mütləq cəza tətbiq olunur: "Bu, mütləq, vacib şərtlərdən biridir. Ancaq beynəlxalq qurumlara və məhkəmələrə rəmzi də olsa, bütün bu hadisələr zamanı müraciət olunmalıdır. İndinin özündə də həm Xocalı soyqırımını törədənlər, həm də Azərbaycanın Dağlıq Qarabağ ərazisində qurulan separatçı rejimin rəhbərləri ilə bağlı məhkəməyə və İnterpola müraciət edilməlidir. Mən özüm də bu barədə təşəbbüs göstərmişəm. Ən azından ona görə ki, Bako Saakyan kimi adamlar ölkədən çıxıb başqa ölkənin rəsmiləri ilə görüşə bilməsin".
Məftun Salmanov
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş