"Azərbaycan humanitar fəlakətdən xilas oldu" – Deputat

"Regionların 2014-2018-ci illərdə sosial-iqtisadi inkişafına dair və bundan əvvəl bu istiqamətdə qəbul edilmiş dövlət proqramları öz müsbət nəticələrini verdi".

Sözügedən dövlət proqramının icrasının yekunlarına həsr olunan konfransda çıxış edən Prezident İlham Əliyevin səsləndirdiyi fikirləri teleqraf.com-a şərh edən deputat Zahid Oruc belə deyib.

Regionların sosial-iqtisadi inkişafına dair proqramlar mühüm bir dönəmdə qəbul olunub:

"Biz yaxşı xatırlayırıq ki, 1990-cı illər Azərbaycanı hansı gündə idi. Müharibə səbəbindən ölkənin ümumi vəziyyəti bir qədər də ağırlaşmışdı. Xüsusilə də, regionlar bu ağırlığı daha çox hiss edirdilər. Regionlarda böyük təsərrüfat sahələri, sənaye müəssisələri öz fəaliyyətlərini dayandırmışdı, buna adekvat olaraq, bütün infrastruktur çökmüşdü. Artıq XXI əsrin əvvəllərində neftdən ilkin gəlirlər əldə edilməyə başladıqdan sonra dövlət başçısı bu istiqamətdə addımlar atmağa başladı. Bu, regionlarla paytaxt arasındakı tərs mütənasibliyi aradan qaldırmağa xidmət edəcəkdi, paralel şəkildə iqtisadiyyatın şaxələnməsinə yol açmalı idi, eyni zamanda, bölgələrdə əhalinin məşğulluğunu artıracaqdı.

Görüləcək işlərin ilkin dönəmində işıq, qaz və su ilə bağlı yaranmış problemləri həll etmək mümkün oldu. Həmçinin, qaçqın və köçkünlərin yerləşdirilməsi məsələsi öz həllini tapdı. Görülən işlər Azərbaycanın humanitar fəlakətdən xilas olmasına imkan verdi. Nəticədə qarşıdakı illərdə daha irəli gedən dövlət proqramlarının həyata keçirilməsi imkanı yarandı. Bu proqramlar 2009-2015-ci illərdə əhalinin aqrar sektorda məşğulluğunun artmasına yol açdı, idxaldan asılılığımızın azalmasına kömək etdi. Bundan sonrakı illərdə bu istiqamətdə qəbul edilən proqramlar ixtisaslaşmaya şərait yaratdı. Taxılçılıq, pambıqçılıq və digər sahələrin inkişafı üçün mühüm işlər görmək mümkün oldu. Tam əminliklə deyə bilərik ki, regionların inkişaf üçün 50 milyarddan çox xərclənmiş maddi vəsait boşa getmədi"

Ölkə rəhbəri ötən illər ərzində güclü strateq olduğunu sübut etdi: "Prezident onu da sübut etdi ki, bölgələrin bərabər formada inkişafına təkan verə bilən və əldə edilən nəticələri görən bir liderdir. Hesab edirəm ki, dövlət başçısının keçirdiyi son müşavirə də aparılan islahatların və ölkə miqyasında gedən yeniləşmə prosesin davamıdır".

Qeyd edək ki, Azərbaycan prezidenti "Regionların 2014-2018-ci illərdə sosial-iqtisadi inkişafına dair" Dövlət Proqramının icrasının yekunlarına həsr olunmuş konfransda çıxış edib. Dövlət başçısı çıxışında bildirib ki, regionların sosial-iqtisadi inkişafına dair üçüncü dövlət proqramı artıqlaması ilə yerinə yetirildi, qarşıya qoyulan bütün vəzifələr icra olundu: "Regionların sosial-iqtisadi inkişafına dair üçüncü dövlət proqramı regionlarda əvvəlki illərdə aparılan islahatlara, görülən işlərə yeni təkan verdi".

Telegramda izləyin

instagramda izləyin