Toya dəvətlər sosial şəbəkələr üzərindən göndərilir - Millət vəkili

İnternet, onlayn media, sosial şəbəkələr həyatımızın bir parçasına, ayrılmaz tərkib hissəsinə çevrilib. Həyatımızı, müasir dünyamızı bunlarsız təsəvvür etmək mümkün deyil. Həyatdakı real münasibətlər virtual münasibətlər müstəvisinə keçib. Bu gün ev, iş telefonları - illərlə gördüyümüz, alışdığımız, istifadə etdiyimiz bu texnoloji avadanlıqlar az qala unudulub, yadırğanıb.

Bəlkə də, kimlərdənsə "axırıncı dəfə nə vaxt ev, iş telefonundan istifadə etmisiniz?", - deyə soruşsaq, cavab verə bilməzlər. Bu gün "Facebook", "Twitter", "WhatsApp", "Instagram" ünsiyyət vasitəsinə çevrilib, insanlar buradan bir-biri ilə əlaqə qurur, hal-əhval tutur. Hətta toy, ad günü şənliklərinə dəvətlər belə dəvətnamələr vasitəsilə deyil, sosial şəbəkələr üzərindən "göndərilir".

Bunu oxu.az-a açıqlamasında BDU-nun professoru, millət vəkili Kamilə Əliyeva deyib.

O, bu yerdə xatırladıb ki, Azərbaycanda internet resurslarından, informasiya-kommunikasiya texnologiyalarından istifadə üçün hər cür imkan və şərait yaradılıb.

Onun sözlərinə görə, bu gün ölkəmizdə internetə, sosial şəbəkələrə giriş tam azaddır, sərbəstdir, burada heç bir məhdudlaşdırıcı, qadağanedici mexanizmlər qoyulmayıb, tətbiq edilməyib.

Oxu: Sahib Alıyev: İnformasiya ilə mina kimi davranmaq olmaz
"Bəzi ölkələr, o cümlədən, özlərini dünyanın demokratiya və insan hüquqlarının təmin edilməsi baxımından ən üstün ölkələri sayan məmləkətlərdə belə bu yöndə bəzi qadağalar, məhdudlaşdırmalar var.

Həmin cəmiyyətlər bunu anlayışla qarşılayır, demokratiya, insan hüquq və azadlıqları, söz, mətbuat azadlığı pozuldu deyib, hay-həşir salmır, ölkələrinin imicinə zərrə qədər xələl gətirə biləcək hansısa cəhdə baş vurmurlar. Ancaq bizdə isə bu məsələlərdə tam azadlıq və sərbəstlikdir.

Kimsəyə qaşın üstə gözün var deyən yoxdur. Bu gün Azərbaycan müasir informasiya-kommunikasiya texnologiyalarının tətbiqinə, istifadəsinə görə dünyanın ən inkişaf etmiş ölkələrindən biri sayıla bilər. Hətta 2013-cü ilin yanvar ayında ölkə prezidenti İlham Əliyevin sədrliyi ilə Nazirlər Kabinetinin 2012-ci ilin sosial-iqtisadi inkişafının yekunları və 2013-cü ildə qarşıda duran vəzifələrə həsr olunmuş iclasda 2013-cü il ölkəmizdə "İKT İli" elan edildi, bununla bağlı sərəncam verildi və ötən illər ərzində bu istiqamətdə böyük nailiyyətlər əldə olundu, uğurlar qazanıldı.

Bu gün ölkədə dövlət və hökumət rəhbərliyi səviyyəsində bu istiqamətdə ardıcıl addımlar atılmaqdadır. Hələ bir müddət öncə ölkə prezidenti xarici kütləvi informasiya vasitələrindən birinə müsahibəsində bunları demişdi:

"Azərbaycan müstəqil interneti olan ölkədir, internet istifadəçilərinin sayı sürətlə artır və artıq təxminən 80 faizə çatıb. Eyni zamanda, ölkədə sərbəst toplaşma, siyasi fəaliyyət azadlığına şərait yaradılır".

Oxu: İlham Məmmədov: Bizə söyənlərin söz haqqı var, bizim yox?
Yəni Azərbaycan dövləti bu məsələdə nələr tələb, nələr arzu olunursa, cəmiyyətdən bu yöndə hansı sifarişlər gəlirsə, onları həssaslıqla, diqqətlə, çevikliklə nəzərə alır və onların reallaşdırılması istiqamətində lazımi addımları atır. Bu məsələlər kiminsə kənardan diktəsi, təzyiqi ilə deyil, məhz özümüzün könüllü seçimimiz əsasında reallaşdırılır. Bu, bizim öz seçimimiz, öz könüllü istəyimizdir.

Ancaq təəssüf ki, son illər, son aylar bu azadlıqdan, bu sərbəstlikdən sui-istifadə edənlər, sosial şəbəkələri, onlayın medianı, internet resurslarını silaha, döyüş, savaş meydanına çevirənlər də tapılır, belələri az deyil.

Onlar bütün vasitələrlə ölkəmizdə görülən işləri, xüsusilə 1993-cü ilin iyunundan və 2003-cü ilin oktyabrından indiyədək görülən işləri gözdən salmağa, onları ləkələməyə çalışırlar, ölkə, dövlət, hökumət rəhbərliyinə, Milli Məclisə, millət vəkillərinə qarşı olmazın hədyanlar, təhqirlər, böhtanlar, iftiralar yağdırırlar.

Sosial şəbəkələr, internet resursları belələrinin, ölkəmizin sevməyən ermənipərəst anti-Azərbaycan dairələrin əlində alətə, oyuncağa çevrilən, dövlətimizə, millətimizə qarşı təzyiq mexanizmi kimi istifadə edilməyə çalışılan insanların "sayəsində" söyüş, qarğış, təhqir meydanına çevrilib. Nə istədi, nə gəldi, ağına-bozuna baxmadan deyirlər, yazırlar, paylaşırlar. Anlamırlar ki, bununla düşmən dəyirmanına su tökürlər.

Anlamırlar, dərk etmirlər ki, onlardan bizi, ölkəmizi istəməyənlər istifadə edir və ya etməyə çalışırlar. Bəziləri isə anlaya-anlaya, bilərəkdən bunları edirlər ki, əslində, onları nə xalq, nə dövlət, nə müstəqillik, nə dövlətçilik, nə Qarabağ, nə şəhidlər maraqlandırır. Onları ancaq və ancaq öz çılız, dar, şəxsi maraqları maraqlandırır. Onları üçün təki pul, pul, pul olsun. Gecə-gündüz xəyallarındakı ancaq budur.

Ancaq belələri bilməlidirlər ki, nə onlar özləri, nə də bilərəkdən və ya bilməyərəkdən qulluqlarında dayandıqları dairələr, mərkəzlər bununla heç nəyə nail ola bilməyəcəklər, Azərbaycanı öz müstəqil inkişaf, müstəqil dövlətçilik xəttindən geri göndərə, sapdıra bilməyəcəklər. Onların təsəvvüründəki və görmək istədikləri Azərbaycan bugünkü Azərbaycan deyil.

Oxu: Ziyafət Əsgərov: Əxlaqsızlığa son qoyulmalıdır
Dövlət başçısının özünün gənclərlə son görüşündə də dediyi kimi, ölkəmizdə daxili vəziyyət sabitdir, Azərbaycan dünyanın sabitlik və təhlükəsizlik adasıdır:

"...Daxili sabitlik hər bir ölkənin inkişafı üçün əsas şərtdir. Biz görürük ki, dünyanın müxtəlif yerlərində sabitlik pozulanda çox böyük faciələr baş verir, o ölkələrin başına çox böyük bəlalar gətirilir.

Biz görürük ki, ölkələr dağılır, milyonlarla insan həlak olur, qaçqın, köçkün vəziyyətinə düşür. Ona görə daxili sabitliyin qorunması hər birimizin əsas vəzifəsidir və bu gün Azərbaycan dünya miqyasında ən sabit ölkələrdən biridir".

Ona görə də sosial şəbəkələri silaha, qalxana çevirənlər, milli-mənəvi, mental dəyərlərimizlə daban-dabana ziddiyyət təşkil edən məsələlərlə məşğul olanlar, intenet arxasında "şirə", "pələngə" dönənlər bir daha yaxşı fikirləşsinlər və əməlli-başlı götür-qoy etsinlər.

Tutduqları yol yol deyil, getdikləri yol yol deyil, nə qədər gec deyil, ziyanın yarısından geri dönsünlər. Dönməsələr, olan özlərinə olacaq, onlar bu əməllərinə görə daim Azərbaycan xalqının tənəsi və lənəti ilə üzləşəcəklər. Seçim onlarındır", - deyə K.Əliyeva əlavə edib.

Telegramda izləyin

instagramda izləyin