Millət vəkili çeçenlərlə azərbaycanlılar arasındakı davadan danışdı

Millət vəkili çeçenlərlə azərbaycanlılar arasındakı davadan danışdı"Moskvada "Neolit" kafesində azərbaycanlılarla çeçenlər arasında baş vermiş münaqişənin millətlərarası münasibətə heç bir aidiyyəti yoxdur. Bu, etnik deyil, məişət zəminində baş vermiş hadisədir". Bu sözləri Sonxeber.az-a Milli Məclisin Qusardan olan deputatı Azər Badamov deyib.

Millət vəkilinin fikrincə, məlum hadisəni etnik zəminə yönləndirmək istəyən qüvvələr var: "Təbii ki, bu qüvvələr bizə düşmən gözü ilə baxanlardır". A. Badamovun sözlərinə görə, Azərbaycanın Şimali Qafqaz xalqları ilə həmişə dostluq münasibətləri olub, əlaqələr çox yüksək səviyyədədir: "Xalqlarımız arasında heç vaxt etnik zəmində münaqişə baş verməyib. Milli münasibətlərdə hər hansı bir münaqişə olmayıb".

Deputat qeyd edib ki, bu, xüsusilə çeçenlərə aiddir: "Ona görə ki, çeçenlər müstəqilliyimizin ilk illərində, ermənilərlə üzbəüz dayandığımız günlərdə yanımızda olublar. Həm də çeçenlərin özləri 1994-96-cı illərdə müharibədən əziyyət çəkərkən kifayət qədər yaralı Azərbaycana gələrək burada müalicə alıb, Azərbaycan onların yanında olub və dəstək göstərib. Bu onu deməyə imkan verir ki, xalqlarımız tarixən bir-birilərinə dost münasibət bəsləyiblər, çətin günlərdə, dar məqamlarda bir-birilərinin yanında olublar".

Həmsöhbətim xatırladıb ki, Azərbaycan Prezidenti İlham Əliyev və Çeçenistanın başçısı Ramzan Kadırov arasında çox böyük dostluq münasibətləri mövcuddur: "Hazırda Azərbaycanın Çeçenistanda böyük layihələrdə imzası var. Xüsusilə qeyd etmək istəyirəm ki, xalqlarımız və respublikalarımız bu münasibətlərə çox böyük dəyər verirlər, münaqişənin milli zəminə yönləndirilməsinə heç vaxt imkan verməzlər. Bu barədə heç düşünməyə dəyməz, çünki bu, adi məişət zəminində baş verən hadisədir. Münaqişənin milli zəminə yönləndirilməsini düzgün saymıram və bu düzgün də deyil. Azərbaycan və Çeçenistan rəsmiləri də bunu çox açıq şəkildə bəyan ediblər. Azərbaycan Prezidenti sözügedən məsələni şəxsən öz nəzarətinə götürüb. Çeçen və azərbaycanlılar arasında milli zəmində gələcəkdə bir hadisənin baş verəcəyini də gözləmirəm".

Xatırladaq ki, fevralın 14-də bir qrup çeçenin azərbaycanlıların Moskvadakı "Neolit" kafesinə basqın etməsi nəticəsində bir nəfər qətlə yetirilib, xəsarət alanlar olub.

Məftun Salmanov

Siyasət   Baxılıb: 787   Tarix: 20 fevral 2019  

Şikayətiniz varsa Whatsapp: 077 7125666

Facebookda Paylaş

Unvan.az - elanlar sayti

DİGƏR MARAQLI XƏBƏRLƏR