Varlının uşağı haram pulla böyüməkdənsə, dövlətin halal pulu ilə böyüsün - DEPUTAT

"Nəinki uşaq pulları bərpa olunmalıdır, hətta təklif edirəm ki, analıq məzuniyyətinə çıxan analara 3 il müddətində hər ay əmək haqları ödənilsin".
Bunu Milli Məclisin deputatı Fəzail İbrahimli Sonxeber.az-a açıqlamasında bildirib.

Onun sözlərinə görə, uşaqlara bir ay ərzində normal qidalanmaq üçün gərəkli olan miqdarda məbləğ verilməlidir. Millət vəkili varlı ailələrin uşaqlarına müavinətlərin verilməməsi ilə bağlı səslənən fikirlərə münasibət bildirərkən deyib ki, bu pul onun valideyninə yox, məhz uşağın qidalanmasına verilir: "Məgər körpə dünyaya gələndə sifariş edir ki, varlı və ya kasıb ailədə dünyaya gəlsin? Bu, uşağın puludur, onun valideynlərinə verilmir. Qoy uşaq həmin varlı ailədə dövlətin halal pulu ilə böyüsün, nəinki rüşvətlə və haramla yığılan pulla. Uşaq bilmir onun atası rüşvətxordur, ya təmiz adamdır. Körpələr məsumdur, millətin gələcəyidir. Uşağın yeməyini təmin edən qida məsullarının qiyməti nə qədərdirsə, iqtisadi dildə buna səbət deyirlər, məhz o səbət dolmalıdır".

F. İbrahimli qeyd edib ki, vaxtılə sovet dövründə dövlət büdcəsindən hər uşağa 15 manat pul ayrılırdı ki, bu həmin körpənin qidalanmasını tam təmin edirdi. Onun sözlərinə görə, çoxuşaqlı ailələr aldıqları uşaq pulu ilə işləməsələr belə, yaşaya bilirdilər: " 10 uşaqlı ailə 150 manat alırdı və valideynlər işləməsə belə, yaşayırdılar. Uşaq pulları nəinki bərpa olunmalıdır, məhz bu səviyyədə
verilməlidir".

Rövşən Rəhimli

Telegramda izləyin

instagramda izləyin