Kişi düz 62 il arvadını aldadaraq özünü lal-karlığa vurub – səbəbi də arvadı ilə bağlıdır

Britaniyalı Douson cütlüyü 80 yaşlarında boşanmaq qərarı verib. Onların işinə hazırda məhkəmədə baxılır. Səbəb isə 84 yaşlı Barri Dousonun həyat yoldaşını 62 il aldadıb, özünü ona kar kimi göstərməsi olub.

Cütlük İngiltərənin Mançester şəhərində yaşayır. Barri Douson etiraf edib ki, həyat yoldaşı Doroti deyingən olduğundan, 62 il onun yanında özünü kar və lal kimi göstərib. Bu illər ərzində qadının yanında bir kəlmə də danışmayıb. Özünü elə aparıb ki, sanki onun dediklərini də eşitmir.

Belə vəziyyətdə cütlük 6 övlad böyüdüb, onların 13 nəvəsi var. Onlar da hesab edirdilər ki, Barri Douson heç nə eşitmir.

Evin xanımı həyat yoldaşıyla hansısa formada anlaşmaq üçün hələ illər öncə jestlərlə danışmağı öyrənməyə başlayıb. Görüb ki, əri hətta jestlərlə də danışmaqda maraqlı deyil.

"İki il mən əllərin köməyilə danışmağı öyrənməyə çalışdım. Artıq jestlərlə danışmağa başlayanda Barrinin gözlərində problem yarandı, pis görməyə başladı. İndi düşünürəm ki, yəqin o, görmə problemini də uydururmuş", – 80 yaşlı Doroti Douson məhkəmədə belə deyib.

Qadın ərinin yalanının necə ifşa olunduğunu da danışıb. Deyir ki, 62 il aldadıldığını internetin sayəsində öyrənib. "Youtube"da təsadüfən "lal və kar" ərinin karaokedə mahnı oxuyarkən çəkilmiş videosunu görəndə təəccüblənib. Həmin gecə o, həyat yoldaşının xeyriyyə tədbirinə getdiyini düşünübmüş.

Yalan ortaya çıxandan sonra özünü təhqir olunmuş hesab edən qadın dərhal boşanmaq üçün məhkəməyə müraciət edib. O, ərindən aldadıldığına görə kompensasiya, həm də sahib olduqları əmlakın yarısını tələb edir.

Barri Dousonun vəkili məhkəmədə deyib ki, əgər müvəkkili özünü lallığa və karlığa vurmasaydı, cütlük hələ 60 il əvvəl boşanacaqdı.(bizimyol)

Telegramda izləyin

instagramda izləyin