"O, polisə verilib, döyüldüyü üçün Cahangirə soyadını verib" - Hüseyn Dəryanın ilk xanımı

Son günlər mərhum reper Hüseyn Dəryanın qızı Ayişənin "Bizimləsən" verilişinə çıxaraq, reperin ikinci evliliyindən olan oğlundan DNT testi etdirməsini istəməsi gündəmdən düşmür. 16 yaşlı Ayişə demək olar ki, hər gün efirə çıxsa da, reperin ikinci həyat yoldaşı oğlunun test etdirməsinə razı olmur. O bildirir ki, ondan ancaq bu cür tələbi Hüseyn Dərya özü edə bilər.

Bu dəfə məsələyə məşhurun ilk həyat yoldaşı Seva qarışıb. O, musavat.com-un suallarına cavab verərək, yaşananlara aydınlıq gətirib:

- Seva xanım, iddia edilir ki, Hüseyn Dərya ilə ayrılmağınıza səbəb Sona olduğu üçün indi qisas alırsınız. Buna görə də DNT testi istəyirsiniz...

- Hüseyn Dərya məndən deyil, mən ondan ayrılmışam, çünki mənə xəyanət etdi. Mən də qadın qüruruma xəyanəti sığışdıra bilmədim və boşandım. Bizim ailəmizi Sona dağıtdı. 16-17 yaşlı, 11-ci sinif şagirdi, özündən 10 yaş böyük, evli və uşaqlı adamın ailəsini dağıtdı. Hüseyn sonradan səhvini başa düşdü, mənə geri qayıtdı, amma gec idi. Mən xəyanəti və yalanı bağışlamıram. Biz heç kimdən qisas almırıq. Qızım içindəki şübhələrə aydınlıq gətirmək istəyir. Bu, onun seçimidir, mən də qızımın istəyinə hörmətlə yanaşıram.

- İndiyə kimi niyə belə tələblər irəli sürməmisiniz, şübhələnməyinizə əsas varmı?

- Mən heç vaxt bu haqda düşünməmişəm. Ehtiyac yoxdur. Amma qızım istəyir, onun əmin olması üçün mən də yanında oluram. Qızımı tək qoyası deyiləm ki... Amma bilin ki, o test mənə lazım deyil. Əgər lazım olsaydı, 5 il gözləməzdim. Bizim ailə efir insanı deyil. Qızımın şübhələri var, çünki ətrafda xeyli insan Cahangirin Hüseynin oğlu olmadığını deyir. Hüseyn bizə deyirdi ki, Cahangir onun oğlu deyil, ona ad-soyadını verməyə məcbur qalıb. Polisə verilib, döyüldüyü üçün məcbur qalıb. Hüseyn iddia edirdi ki, o, narkotikdən istifadə edirdi və övladı olması mümkün deyildi. Qızım bunları atasının ağzından eşitdiyi üçün bu cür addım atır. Sona nikah kağızını və uşağın doğum haqqında şəhadətnaməsini göstərir. O sənədlərdən bizdə də var. Biz DNT testi istəyirik. O, özü-özündən arxayın deyil, niyə qaçır? 2006-cı ilin oktyabrında onlar nikah bağlayıb, Cahangir isə həmin ilin dekabrında doğulub. Onlar nikaha gedəndə Sona 7 aylıq hamilə imiş, Hüseyn məcburiyyətdən evlənib. "Bizimləsən"in eksperti olan Hacı Sonanın göndərdiyi kəbin kağızına baxdı, bildirdi ki, bu, kəbin kağızı deyil. Deməli, Sona camaatı aldadır.

- Sona da verilişdə dedi ki, 10 ildən çoxdur, eyni nömrəni işlədir. Niyə Ayişə Sonaya yox, "Bizimləsən" verilişinə müraciət edib?

- Nə mənim, nə də qızımın Sonadan xəbəri yox idi. Düzdür, qızım istəsəydi, mən Sonanın nömrəsini tapa bilərdim. Qızım dedi ki, atamın sözlərindən sonra mən Sonadan heç nə tələb edə bilmərəm, çünki onların məni düzgün yönləndirəcəklərindən əmin deyiləm. Sona xanım deyir ki, Ayişə istəsə, ona zəng edə, Cahangirə bacılıq edə bilərdi. Onun sözləri səmimi və inandırıcı deyil. Məsələn, deyir ki, Hüseyn küçələrdə qalanda heç kim ona dəstək olmadı. H.Dərya qəzaya düşəndə gecə ilə təyyarəyə minib, Moskvadan Bakıya gəldim. Bakıda olan Sona yanında deyildi. Ayişə şəffaflıq üçün "Bizimləsən" verilişinə çıxdı.

- İddia edilir ki, Ayişə məşhur olmaq üçün bu addımı atır. Bu, nə dərəcədə doğrudur?

- Əgər qızım məşhur olmaq istəsəydi, Hüseyn Dəryanın qızı kimi telekanallara çıxar, məşhurluq üçün çalışardı. Amma Ayişənin tək istəyi qardaşının doğma olub-olmadığını dəqiqləşdirməkdir. O, xaricdə təhsil alıb, istedadlı və savadlıdır. Ona məşhurluq lazım deyil.

- DNT testi edilsə, Cahangirlə Ayişə bacı-qardaş çıxsa, nələr dəyişəcək?

- Ayişə və Hüseynin ailəsi Cahangirin reperin oğlu olub-olmamasını bilmək istəyir. Əgər həqiqətən oğludursa, onu da Ayişə kimi bağırlarına basıb, sevəcəklər. Çünki Hüseynin bioloji balası onların qanından, canındandır. Əgər Hüseynin oğlu olmasa, Ayişə yenə də Cahangiri sevəcək və ömrünün sonuna kimi onun yanında olacaq.

Telegramda izləyin

instagramda izləyin