Toyda qardaşını döyən şəxsi kürəyindən bıçaqladı — Azərbaycanda qanlı hadisə

Daşkəsəndə həmyerlisini bıçaqlamaqda təqsirləndirilən Şahvələd İsgəndərovun cinayət işi üzrə ibtidai istintaq yekunlaşıb.
Sonxeber.az "Ölkə.Az"a istinadən xəbər verir ki, cinayət işinin materialları baxılması üçün Gəncə Ağır Cinayətlər Məhkəməsinə göndərilib və hakim Məmməd Bağırovun icraatına verilib.

Məhkəmənin baxış iclası aprel ayının 3-nə təyin edilib.

Qeyd edək ki, hadisə ötən il Daşkəsən rayonunda baş verib. Rayonun mərkəzində yerləşən "İlkin" şadlıq evində təşkil olunmuş toy mərasiminə qatılan Əvəz Əzizov ilə Elvin Məmmədov arasında mübahisə düşüb. Mübahisə sonradan davaya keçib və onlar şadlıq evinin həyətinə düşüblər. Orada E.Məmmədov dostları - Rəvan və Adil adlı şəxslərlə birgə Ə.Əzizovu döyüb.

Məsələdən xəbər tutan Ə.Əzizovun qardaşı Ş.İsgəndərov qisas məqsədilə E.Məmmədovu kürəyindən bıçaqlayıb.
Yaralı xəstəxanaya çatdırılıb. Onun həyatını xilas etmək mümkün olub.

Hüquq-mühafizə orqanları əməkdaşlarının həyata keçirdiyi əməliyyat-axtarış tədbirləri nəticəsində Ş.İsgəndərov saxlanılıb, onun barəsində Cinayət Məcəlləsinin 126.1-ci (qəsdən sağlamlığa ağır zərərvurma) maddəsi ilə ittiham irəli sürülüb.

Telegramda izləyin

instagramda izləyin