""ATV" və "Xəzər" telekanalları prezidentlə görüşdən əvvəl bizi təhqir edirdi, sonra isə..."

"Planet Parni iz Baku" KVN teatrı 19, 20, 21 və 22 apreldə "Nataşa, mı prişla" adlı konsertlə onları sevənlərin hüzuruna gələcək.

Oxu.az bu münasibətlə teatrın bədii rəhbəri, rejissor və aktyor Tahir İmanovdan müsahibə alıb.

Lakin konsertlə bağlı suallarımıza keçməzdən əvvəl son günlər "Planet Parni iz Baku" ətrafında gedən söhbətlərə toxunmaq qərarına gəldik.

(Əvvəli)

– Ölkə prezidenti İlham Əliyev bu yaxınlarda mədəniyyət nümayəndələri ilə görüş keçirdi. Siz də ölkə başçısı ilə görüşənlər arasında idiniz. Orada prezidentə telekanalların sizə olan qadağasından danışdınız. Bu görüşdən sonra dəyişən nə olub?

– Açığı, hələ cənab prezidentlə görüşümüzdən əvvəl bizə bir neçə dəfə "İctimai" TV-nin rəhbəri Balaş Qasımov zəng edib və konsertlərimizi efirə verməyi təklif edib. Sadəcə, son dörd ildə məmurların bizə təzyiqini nəzərə alaraq, mən ona dedim ki, lazım deyil.

İstəmədim ki, bizim üzləşdiyimiz çətin anlarla o da üzləşsin. Çünki o vaxtlar Balaş Qasımov "İctimai" TV-yə yenicə rəhbər təyin olunmuşdu. Telekanalın işləri onun başından aşırdı. Həmin problemlərlə yanaşı, bizim də problemlərimizi çəkməyini özümüz istəmədik. Amma təklifinə görə Balaş qardaşıma minnətdaram. O, çox böyük cəsarət göstərdi.

Elə cənab prezidentlə görüşdən dərhal sonra bizimlə əlaqə saxlayan da Balaş Qasımov oldu. İndi konsertlərimiz bu telekanalda göstərilir. Bundan sonra ARB telekanalından təklif gəldi.

Telekanal rəhbərliyi ilə görüşüm əsnasında məlum oldu ki, sən demə, bu illər ərzində ARB-də bizə qadağa olmayıb. Uzun sözün qısası, layihələrimizi hazırda bu iki telekanal göstərir.

ATV-dən isə "Beşinci Element" verilişində çəkilmək təklif olunmuşdu. Soruşdum ki, orada nədən danışacağıq? Dedilər ki, sizin fəaliyyətinizdən. Mən də dedim ki, mənim fəaliyyətim sizin telekanalda işıqlandırılmırsa, nədən danışa bilərik ki?

Məsələn, istənilən müğənninin fəaliyyətindən ATV-də bəhs edilir. Amma "Planet Parni iz Baku"nun konsertindən heç bir parça da göstərilmir. Belə başa düşdüm ki, ATV bunu hesabat üçün etmək istəyir ki, biz onlara efir verdik. Halbuki bizim davamız odur ki, bütün konsertlərimiz, filmlərimiz efir üzü görsün.

"Xəzər" TV, ümumiyyətlə, bizə yaxın gəlmir. Ölkə başçısı ilə dialoqumuza, demək olar ki, geniş yer ayırmadılar. "Lider" TV-də isə bizə əvvəldən qadağa var.

"Space" TV də öz ampluasında qalır. Mən heç o telekanala qayıtmaq da istəmirəm. Çünki bu telekanal əvvəlcə "Planet Parni iz Baku"ya öz borcunu ödəməlidir. 2012-ci ildə ölkə başçısının ehtiyat fondundan Azərbaycan serialları üçün ayrılmış pullardan bizə gəlib çatmayıb. O vaxt bizə "Bir kəndin sevinci" serialını çəkdirdilər, amma pulumuzu vermədilər. Dedilər ki, pulumuz yoxdur. Bu telekanal indiyədək bizə həmin pulu borcludur. Özü də bu borc devalvasiyadan əvvəlki kursladır.

– Təxminən borc nə qədər məbləğ təşkil edir?

– Təxminən 70 min. Bizə ilk qadağanı da məhz "Space" telekanalı qoyub. O vaxt telekanalın rəhbəri Vaqif Mustafayev öz mövqeyini açıq-aydın bildirsəydi, başqalarının fikri ilə oturub-durmasaydı, heç bu gün belə xırda problem də işıq üzü görməzdi.

Bir şeyi də qeyd edim ki, həm ATV, həm də "Xəzər" telekanalları prezidentlə görüşdən əvvəl bizi təhqir edirdi. Sən demə, biz səviyyəsizik, tamaşalarımızın duzu yoxdur. Bu, onların mövqeyidir. Amma cənab prezidentin mövqeyini gördünüz. Tamamilə ayrı-ayrı mövqelərdir.

Onlar öz verilişlərində bizi sifarişlə təhqir edirdilər. Bu dörd ildə bizim çəkdiklərimizi Allah heç kimə göstərməsin. Hamı başımıza KVN-çi çıxmışdı. Deyirdilər, bunu belə etməlisiniz, müasir yumor aktyorları ilə ayaqlaşmalısınız. Onlara başa sala bilmirdim ki, biz zirvədəyik, ordan aşağı düşüb kiminləsə ayaqlaşmalı deyilik…

Bizə təhqirlər ölkə başçısı konsertlərimizə baxmağa gələndə dayanırdı. Onda telekanallar, aktyor və aktrisalar üçün biz hamıdan yaxşı idik. Onda bizə nəsə deməyə heç kimin hünəri çatmırdı. Bu dörd ildə biz dözdük, mübarizə apardıq və sonda qalib gəldik.

– Xatırlayıram ki, "Space" telekanalı vaxtilə "Məhəllə" və "Məhəllə 2" filmlərini göstərirdi. Monitorinq aparmısınızmı ki, qadağadan sonra bu telekanal həmin filmləri göstərir?

– Bizim icazəmiz olmadan heç bir layihəmizi efirdə göstərə bilməzlər. Çünki burada müəllif hüquqları var. Heç biz buna razı olmarıq ki, göstərilək. Çünki "Space"in daha böyük layihələri var: hind kinoları (gülür). Ona görə də mən inanmıram ki, onlarda "Məhəllə" üçün yer tapılsın.

– Martın 3-də "Məhəllə 3"ün böyük təqdimatını uğurla keçirdiniz. Aprelin 19-dan isə dörd günlük "Nataşa, mı prişla" "Planet Parni iz Baku" KVN teatrının solo konserti olacaq. Arada məsafə az deyil? Yəni konserti bir qədər arxa tarixə atmaq olmazdımı?

– Bu, o baxımdan problemdir ki, özümüz özümüzə rəqib olmuşuq. Heç ən dəhşətli yuxumda da görməzdim ki, "Məhəllə 3" "Planet Parni iz Baku"nun konsertinə rəqib olar (gülür). Prodüser kimi deyirəm ki, iki böyük layihəni paralel olaraq aparmaq çox çətindir. Tamaşaçı elə bilir ki, camaatı güldürdülər, çıxdılar, getdilər... Belə deyil. Bunun elə hazırlıq mərhələsini götürsən, böyük insan qüvvəsinin əziyyətini görərsən.

Prodüserlər, reklam işinə baxanlar, monitorlara, bilbordlara, posterlərə cavabdeh şəxslər, Heydər Əliyev Sarayı ilə müqavilə bağlayan digər şəxslər – hamı işləyir. Bunların hamısı paralel şəkildə həyata keçirilir. Hələ mən sponsorlarla olan söhbətlərdən danışmıram. Şəxsən bu, mənim üçün aldadıcı bir prosesdir.

Çox şirkət deyir ki, siz qadağa altındasınız deyə biz sizə sponsorluq edə bilmərik. Ona yalnız televiziyalarda qadağada olduğumuzu başa salanadək vaxtımız gedir, səhhətimiz pozulur. Ona görə də hər gün Allahıma dua edirəm ki, məni bu cür alçaldıcı proseslərdən uzaq etsin.

Yaradıcı insan ancaq yaradıcı işlə məşğul olmalıdır. Mən həm ssenari müəllifləri ilə, həm prodüserlərlə, həm də aktyorlarla işləyirəm. Evə gələndə isə ailəvi işləri görməyə gücüm də qalmır.

Yeri gəlmişkən, onu da deyim ki, ola bilsin ki, konsertimiz dörd yox, beş günlük olsun. Çünki biletlər tükənmək üzrədir. Camaatın tələbatını nəzərə alaraq, aprelin 23-də də konsert verə bilərik.

– Ümumiyyətlə, siz təqdimatınızı kinoteatrlarda yox, Heydər Əliyev Sarayında edirsiniz. Bunun özəl səbəbi varmı?

– Bu, ilk növbədə tələbatla bağlıdır. İkincisi, filmin adı artıq hər şeyi deyir. "Məhəllə" artıq brendə çevrilib. "Parni iz Baku" deyəndə "Məhəllə", "Məhəllə" deyəndə "Parni iz Baku" yada düşür.

Məsələn, Tahir və Cabir İmanovların kim olduğunu soruşsalar, dərhal deyəcəklər ki, Eliş və Roşkadır. O biri obrazlar artıq ikinci dərəcəlidir. Hardasa Eliş-Roşkaya Ağanatiq obrazı rəqib ola bilər.

Vaxt olub ki, camaat kassaya gələndə soruşurdu ki, bilmirsiniz, "Məhəllə" olacaq, ya yox? Yəni sırf "Məhəllə"yə görə gəlirdilər. Məhz belə tələbata görə, qrupumuz qərar verdi ki, mütləq təqdimat Heydər Əliyev Sarayında olmalıdır. Tarixə nəzər salsaq, "Məhəllə"nin birinci və ikinci hissələrinin təqdimatı da məhz bu məkanda baş tutub. O vaxt kinoteatrlar da yox idi.

– Ola bilərmi ki, "Məhəllə 3"də qaldırılan problemlərin ssenari ardıcıllığı konsertdəki "Məhəllə"də davam etdirilsin?

– Apreldə digər məhəlləmizin sakinlərinin macəralarından söhbət açacağıq. O da Rusiyada yaşayan bizim soydaşlarımızdan gedir. Bu, el arasında "Fedot" kimi tanınan Fəxrəddin, mənim yeni yaratdığım obraz Əlövsət və Bəhram Bağırzadənin canlandırdığı Familin sərgüzəştləri barədə olacaq. Daha dəqiq desəm, el arasında bu üç personaja "Nataşa, tı prişol" deyirlər (gülür).

Biz artıq qərara gəldik ki, həmin Nataşanı göstərək. Çünki iki ildir, Fedot deyir ki, Nataşa, tı prişol? İndi həmin qəhrəmanlar Rusiyaya – Nataşanın hərisinə gedir. Azərbaycanlılar Nataşanın qaldığı daxmada onun valideynlərindən həri istəyəcəklər. Bu necə olacaq? Gəlib, görərsiniz. Qabaqcadan deyə bilərəm ki, çox gülməli olacaq.

– Nataşa "Planet Parni iz Baku"nun əməkdaşı olacaq, yoxsa kənardan bir aktrisa dəvət ediləcək?

– Yox, kənardan bir nəfər olacaq. Açığı, bizdə bu rola uyğun Marina Litvinenko var. Lakin Fedotun "Tvar" dediyi bu xanımı artıq biz Bəhrama calamışıq. O, Bəhramın oynadığı Famil obrazının həyat yoldaşıdır. Bu bir il ərzində bizdə çoxlu maraqlı hadisələr olub. Misal üçün, robot Sofiyanın Azərbaycana gəlməsi mühüm bir hadisədir və biz bu hadisədən yan keçə bilməzdik. Siz bu hadisəni də görəcəksiniz.

"WhatsApp"larda tufanla bağlı yayılan səs ismarıclarından da yan keçə bilməzdik. Bir sözlə, hansı hadisə baş veribsə, o, yumor, satira çərçivəsində öz əksini bizim konsertdə tapacaq. Bu bizim tamaşaçı qarşısında hesabat konsertimiz, imtahanımızdır.

Biz ötən il dörd günlük konsertin anşlaqına nail olmuşuq. Sosial şəbəkələr, bilbordlar vasitəsilə bunu bacarmışıq.

– "Nataşa, tı prişol" və ya konsertin indiki adı ilə götürsək, "Nataşa, mı prişla"nın filminin çəkilməsi necə, gələcək planlarda var?

– Mənim çox yaralı yerimə toxundunuz. Fedot obrazını mən fikirləşəndə və dörd nəfərdən ibarət ssenari qrupumuza deyəndə, onlar buna etiraz etdilər. Dedilər ki, əvvəl buna oxşar obraz canlandırmışıq. Amma üç ildən sonra uşaqlara sübut edə bildim ki, heç vaxt bu obrazlar dəbdən düşmür, əksinə, sevilir. Belə oldu, üç dəqiqəlik sınaq kimi səhnə qurduq.

Təsəvvür edin ki, bu üç dəqiqəlik səhnəyə heç böyük layihələrimizdə belə güclü alqışlar səslənməmişdi. Yəni bu Fedot obrazı çox sevildi. Hətta Rusiyada restoranları olan məşhur Novikov bu səhnəni götürüb sosial şəbəkədəki profilində paylaşmışdı.

Həmin ərəfədə yeni konsertimizə hazırlaşırdıq. Konsertin adı da belə olmalı idi: "Formula 1, 2, bizimki". Amma Novikovun "Instagram"dakı paylaşımını gördükdən sonra Moskvadan ssenari qrupuna zəng edib dedim ki, təcili konsertin adını dəyişin.

Bizə böyük səhnə lazım idi. Hətta təyyarə götürüb onun içində çəkilmək ideyası da vardı. Bəli, gələcək üçün bizim bu obrazlarla bağlı çox ciddi planlarımız var. Düşünürəm ki, bu dəfə də uğurlu olacaq. Bu konsertdə Rusiya və Azərbaycan xalqlarının dostluğunu, mədəni əlaqələrini də göstərəcəyik.

– Fedot sizin tanışlarınız içərisində varmı?

– İnanın mənə, həm Cabirin, həm Bəhramın, həm də mənim oynadığım obrazların üçü də real həyatda var. Bizim o insanlara heç bir iradımız yoxdur. Əksinə, təklifimiz var ki, əgər siz Rusiyada otuz ildən çox yaşayırsınızsa, bu ölkənin vətəndaşlığını daşıyırsınızsa, azdan-çoxdan bu dili öyrənin.

Bizdə Marina Litvinenko, Yana Nikitina azərbaycanca təmiz danışır. Necə ki biz başqa millətlərdən azərbaycanca danışmağı tələb edirik, siz də yaşadığınız ölkənin dilini bilməlisiniz. Dili bilməmələri bir yana, şəhərlərin adlarını da düz tələffüz etmirlər.

Şəhərin adı "Peterbruq", "Murmanskı" deyil, "Peterburq", "Murmansk"dır. İstənilən insan yaşadığı ölkənin qanunlarına tabe olmalıdır. Bundan başqa, onlara sözümüz yoxdur. Şəxsən mən fəxr edirəm ki, onlar xarici ölkədə yaşaya, biznes, ailə həyatı qura bilirlərsə, deməli, şəxsiyyət kimi formalaşıblar. Əsas odur ki, ölkəmizin adını batırmasınlar.

1992-ci ildə Moskvaya "Parni iz Baku"nun konsertinə gedəndə valideynlərimdən xeyir-dua aldım. Atam və anamdan xeyir-dua aldıqdan sonra babam Süleyman Ələsgərovun yaşadığı Bəstəkarlar Evinə gəldim. Təbii ki, nənəm buna etiraz etdi. Amma babam dedi ki, əgər valideynlərin icazə veribsə, mənim buna heç bir etirazım yoxdur.

Sadəcə, mənə dedi ki, özünü elə apar ki, nə ailəmizə, nə də millətimizə söz gəlsin. Bax, bu nəsihəti özümə o vaxtdan həyatımın düsturu kimi seçdim.

– Konsertlərinizi bölgələrdə keçirmək kimi planınız varmı? Yoxsa fikirləşirsiniz ki, hələ bölgə əhalisi sizin yumoru anlamaq gücündə deyil?

– Yox, belə düşünmürük. Əksinə, bilirik ki, onlar bizim yumorumuzu ən yüksək səviyyədə qəbul edir. Bizim böyük aktyorlarımız məhz bölgələrdən çıxıb…

Təbii ki, bölgələrdə konsert verməyi istərdik. Amma hazırda nə belə dəvət, nə də dəstək almışıq.

Dəvət olsa, bölgədə də konsert verməyə hazırıq.

Telegramda izləyin

instagramda izləyin