Ekspertdən DİM-ə ETİRAZ

2019/2020-ci tədris ili üçün keçiriləcək qabiliyyət imtahanlarının müsabiqə şərtlərində bəzi dəyişikliklər edilib.

Məsələ ilə bağlı Sonxeber.az-a təhsil üzrə ekspert Kamran Əsədov qabiliyyət imtahanlarının əleyhinə olduğunu söyləyib.

Ekspertin sözlərinə görə, təəssüflər olsun ki, uzun müddətdir qabiliyyət imtahanlarında rüşvətin olması barədə danışılır:

"Ancaq bununla bağlı hər hansı rəsmi açıqlama və ya göstərici yoxdur. Problem də elə bundadır. Mən qabiliyyət imtahanlarının əleyhinəyəm. Əvvəllər bu imtahanlar ayrı-ayrı ixtisaslar üzrə idi. Sonradan 5-ci qrupu yaradaraq bütün qabiliyyət tələb edən ixtisasların imtahanlarını bura keçirdilər. Bununla da yeni qaydalar yaratdılar ki, 5-ci qrupda iştirak edən 3-də iştirak edə bilər və s. Bu qaydaları o qədər qarışdırdılar ki, bütün abituriyentlər çaş-baş qaldı. Ümumiyyətlə, "qabiliyyət" sözü nə deməkdir? Qabiliyyətsiz insanın universitetdə nə işi var?".

Kamran Əsədov hesab edir ki, aktyorluq, rejisorluq, jurnalistika, musiqi alətlərində ifa və bu kimi digər ixtisaslar üçün əlavə qabiliyyət imtahanına ehtiyac yoxdur:

"Lütfəli Abdullayev, Nəsibə Zeynalova və onlar kimi məşhur sənətkarlar qabiliyyət imtahanı veriblər? Bizim neçə-neçə görkəmli jurnalistlərimiz olub. Onlar hamısı qabiliyyət imtahanı veriblər? Nə üçün jurnalist, rejissor qabiliyyət imtahanı verməli, ancaq həkim, müəllim belə bir imtahan verməməlidir? Həkim, ya müəllim qabiliyyətsiz olmalıdır? "Qabiliyyət" sözünü orfoqrafik lüğətdə axtarsaq, o sözün mənası elə təhqir mənasında gedir. Hətta birini təhqir edəndə deyirik ki, "Sən nə qabiliyyətsiz adamsan". Bu ixtisaslar arasında ayrı-seçkilik yaratmaqdır. Filankəs qabiliyyətli ixtisaslar qrupunda oxuyur, filankəs qabiliyyətsiz… Bunların hamısı səs-küy yaratmaq hesabına atılan addımlardır. İndiyə kimi görkəmli jurnalistimiz, aktyor və ya aktrisalarımız, rejissorlarımız olub. Onların heç biri qabiliyyət imtahanı verməyib axı. Qabiliyyət imtahanının ortaya atılması insanlarda əlavə problemlər yaradıb. İsti havada bütün məzunlar, abituriyentlər DİM -in əlində qalıblar. Dünya təcrübəsində heç vaxt belə bir şey tətbiq olunmayıb. Onlarda bir imtahan olur. Bu onların həm buraxılış, həm də universitetə qəbul imtahanı olur. Bizdə isə, 2-3 dəfə imtahan keçirilir ki, uşaqlar adicə bakalavr pilləsinə qəbul ola bilsin. DİM tərəfindən edilən dəyişiklik abituriyentlərə əlavə imkanlar açsa da, dizayn ixtisası üzrə əlavə rəqabət yaradacaq. Çünki yeni qaydalardan sonra Təsviri Sənət İxtisası üzrə qabiliyyətdən müvəffəqiyyətlə keçənlər Dizayn ixtisasını da seçə biləcək ki, bu da rəqabət mühitini artıracaq".

Gülnarə Eynullaqızı

Telegramda izləyin

instagramda izləyin