"Həkim sistemi taxıb çay içməyə getdi, nəvəm keçindi..." - Xəstəxanada ölən 7 aylıq körpənin nənəsi

Mayın 20-də A.F.Qarayev adına 2 saylı uşaq kliniki xəstəxanasında ölən 7 aylıq Ayla Abdullayevin ailəsi Səhiyyə Nazirliyinin qarşısında aksiya keçirib.

Sonxeber.az BiG.AZ-a istinadən xəbər verir ki, nənəsi aksiya zamanı bildirib ki, Ayla yaxşı yemirdi, həm də nəcisi isə göy idi:

"Ona görə də uşağı A.F.Qarayev adına 2 saylı uşaq kliniki xəstəxanasında Ramin həkimin yanına gətirdim. O, bizi analizə göndərdi. Dövlət xəstəxanasında bütün müayinələri pullu etdirmişik. Ramin müayinələrin sonunda bildiridi ki, uşağın ciddi probelemi yoxdur. Bizi infeksion şöbəsindən həkim Mətanət Rzayevanın yanına göndərdi. Uşağa sistem yazdılar. Həkimlər sistemi taxıb çay içməyə gedirlər. Sistem zamanı uşağın qolundan qan gəlir. Mətanət qanı görən ki, xadimələrə tapşırır ki, tez yataq dəstini yuyun, qanı heç kim görməsin. Ordakı bütün ədyalları yuduzdururlar. Gəlinə tapşırırlar ki, qaynana və anana demə, yoxsa qırğın düşəcək. Ayla sistemdən 2 gün sonra dünyasını dəyişir. Ayla ölən günü yenə sistem qoyuldu. Sistem zamanı nəvəmin rəngi göyərdi. Mən hay-haray salandan sonra tibb bacıları dedilər ki, uşaq keçinib. Baş həkimin yanına gələndə bizə rüşvət təklif edirlər ki, səsinizi çıxartmayın, ekspertizaya da göndərməyin. Uşaq onsuz da ölüb, yarıb ikinci əziyyəti verməyin. Mən uşağın meyitini götürüb nazirin qəbuluna gələndə heç kim bizi içəri buraxmadı. Təssəvvür edirsiniz xəstəxanada xadimələr sistem vurur, xəstəxanada nə temperatur ölçən, nə də lazım olan dərmanlar yox idi. Hər şeyi özümüzə aldırdılar".

Qeyd edək ki, sonda Abdullayevlər ailəsi prezidentə və Azərbaycanın birinci vitse-prezidenti Mehriban Əliyevaya müraciət edərək körpənin ölümünə səbəb olan həkimlərin cəzalandırılmasını istəyib.

Məsələ ilə bağlı BiG.AZ A.F.Qarayev adına 2 saylı uşaq kliniki xəstəxanası ilə əlaqə saxlayıb.

Xəstəxananın həkimi Eldar Rəhimov bildirib ki, 7 aylıq Ayla Abdullayevin meyiti ekspertiza üçün morqa göndərilib: "Hazırda iş prokurorluqdadır. Bu barədə öncədən bir söz demək çətindir. Uşaq mayın 13-ü mədə-bağırsaq pozulması diaqnozu ilə xəstəxanaya gətirilib. Mayın 20-si isə dünyasını dəyişib. Həkimlər Ramin və Mətanət Rzayeva hazırda iş başındadır. Baş həkimin valideynlərə rüşvət təklif etməsi doğru deyil. Valideynləri də anlayıram. Çünki övladları dünyasını dəyişib. Ekspertizanın nəticəsi olmadan bir söz deyə bilmərik".

Telegramda izləyin

instagramda izləyin