Sarkisyan da aprel hadisələri ilə bağlı komissiyaya QATILA BİLƏR

"Ermənistan Baş Naziri Nikol Paşinyanın təklifi əsasında 2016-cı ilin dörd günlük aprel müharibəsi ilə bağlı bütün halları araşdırmaq üçün yaradılacaq parlament komissiyasına ehtiyac yaranarsa, sabiq Prezident Serj Sarkisyan da dəvət edilə bilər".

Sonxeber.az-ın "Sputnik Ermənistan"a istinadən verdiyi xəbərə görə, bu barədə Təhlükəsizlik və Müdafiə Daimi Komitəsinin üzvü Tiqran Karapetyan 2016-cı il hadisələri ilə əlaqədar keçiriləcək ilk iclası şərh edərkən bildirib.

"Aprel hadisələri ilə əlaqədar cəmiyyəti maraqlandıran bütün məsələləri müzakirə edəcəyik... Biz indiki və ya keçmiş vəzifəli şəxslərin dəvəti ilə nəsə etməyə məcbur deyilik. Serj Sarkisyanın iştirakı lazım olsa, onu dəvət edəcəyik", - deyə o, söyləyib.

Onun sözlərinə görə, Komissiyanın təyin olunmuş səlahiyyətləri var və dəvət edilmiş şəxslər mütləq orada iştirak etməlidirlər. Bundan başqa, cavabları nəinki Ermənistanda, həm də qondarma Qarabağda gözləyirlər.

Xatırladaq ki, 2016-cı il aprelin 1-dən 2-nə keçən gecədən başlayaraq işğalçı Ermənistan Silahlı Qüvvələrinin Qondarma Dağlıq Qarabağın hərbi birləşmələri ilə Azərbaycan ordusuna qarşı təxribatı nəticəsində bir neçə hərbi qulluqçumuz şəhid olub.

5 apreldə hər iki tərəfin razılığı və beynəlxalq qurumların müşahidəsi ilə yenidən atəşkəs müqaviləsi imzalanıb. Buna baxmayaraq, Ermənistan tərəfindən dəstəklənən seperatçı qüvvələr atəşkəs imzalanmazdan bir neçə saat sonra onu dəfələrlə pozub, bu proses bugünə qədər davam edir.

Telegramda izləyin

instagramda izləyin