Ermənistanda nə qədər "İsgəndər" var? - Paşinyanın blefi, yoxsa...
"Ermənistanın Baş naziri Nikol Paşinyanın ciddi fikir səsləndirməsinin şahidi olmamışam. Bu adam bir-birinə zidd fikirlər səsləndirir, gah nala vurur, gah da mıxa. İndi də "İsgəndər" məsələsini ortaya atıb".
Bunu Sonxeber.az-a hərbi ekspert Üzeyir Cəfərli N. Paşinyanın "Ermənistanda kifayət qədər "İsgəndər" raketləri var" sözlərini şərh edərkən deyib.
Ekspert bildirib: "Onlar heç olmasa bir dəfə bu, "İsgəndər"i göstəriblər? Bir dəfə hərbi parad zamanı üstüörtülü vəziyyətdə olan zenit-raket kompleksi nümayiş etdirdilər. Sonradan məlum oldu ki, bu, Rusiyanın Gümrüdəki hərbi bazasındakı "İsgəndər-E" zenit-raket kompleksidir. Bu məsələ beləliklə bağlandı. İndi N. Paşinyanın Ermənistanda kifayət qədər "İsgəndər" raketinin olması deməsi ondan xəbər verir ki, Baş nazirin başı xarab olub. Əvvəla Rusiyanın həmin raketləri hazırlaması üçün müəyyən vaxt lazımdır, belə ki, Moskva həmin raketlərin tədarükü ilə bağlı bəzi ölkələrlə imzalanmış müqavilələri hələ yerinə tam yetirə bilməyib. Yəni həmin raket kompleklslərini vaxtında tədarük edə bilmir".
Onun sözlərinə görə, N. Paşinyan tarixə qeyri-ciddi siyasətçi kimi düşəcək: "Onun hərbdən anlayışı yoxdur. Biz onun sərsəm bəyanatlarını müzakirə etməli deyilik. Öz işimizlə məşğul olmalıyıq. ATƏT-in Minsk qrupunun həmsədrlərini buradan çıxarıb öz işimizi görməliyik. Onlar Azərbaycanın haqq işində maneədirlər. ABŞ, Rusiya və Fransaya dəstək olmaqla danışıqlar prosesini uzadırlar. Dünən də bir əsgərimiz şəhid oldu. Bunlar heç səslərini çıxarmırlar. Ali Baş komandanın bir əmri ilə ordumuz Ermənistanda daşı-daş üstündə qoymaz".
Ekspertin fikrincə, N. Paşinyanın "kifayət qədər "İsgəndər" raketlərimiz var" deməsi blefdir və daxili auditoriyaya hesablanmış bəyanatdır: "Özünü göstərir, yəni mən də varam deyir. Oğlunu separatçıların ərazisindən gətirib yanında saxlayırsa, deməli narahatdır ki, elə proseslər baş verə bilər ki, başını qaşımağa vaxtı olmasın. Paşinyanı ciddi siyasətçi saymıram. Dünən dediyini bu gün danır. Şişirtməməliyik ki, Paşinyan guya o qədər böyük ağlın sahibidir. Hərbi sahədən anlayışı olmayan ikinci adam Paşinyanın özüdür. Ona ciddi şəxs kimi yanaşmıram. Sadəcə Rusiya hələlik onun arxasında dayanır. Ona görə də Ermənistan özünü guya bir az "inamlı" aparır. Bunun da bir sonu olacaq. Gec-tez məsələsi var".
Xatırladaq ki, N. Paşinyan Rusiyaya səfəri zamanı verdiyi müsahibədə Moskvanın İrəvana yeni silahlar tədarük edib-etməyəcəyinə dair sualı cavablandırarkən bildirib ki, Ermənistanda kifayət qədər "İsgəndər-E" raketi var və Rusiyadan daha nəsə almağa ümid edir.
Məftun Salmanov
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş