İran Ermənistanla Naxçıvan sərhədində təlim keçə bilərmi? - DEPUTATDAN VACİB AÇIQLAMA

"Azərbaycanın güclənməsi, o cümlədən hərbi qüdrətinin artması Ermənistanı hər dəfəsində narahat edir. Azərbaycanın öz ərazisində beynəlxalq hüquqa zidd olmayan istənilən addım atmağa tam hüququ var".

Bunu Sonxeber.az-a Milli Məclisin deputatı Aydın Mirzəzadə erməni politoloq Sergey Şakaryantsın Türkiyə və Azərbaycanın Naxçıvanda hərbi təlimlər keçirməsinə cavab olaraq Ermənistanın İranla birgə Naxçıvan sərhədində təlim keçirməsi təklifini şərh edərkən deyib.

A.Mirzəzadənin sözlərinə görə, Türkiyə Azərbaycanın strateji müttəfiqidir: "Bu baxımdan onunla əməkdaşlıq bütün sahələri, həmçinin hərbi sahəni əhatə edir. Ermənistanın narahatçılığı isə ilk növbədə Azərbaycanın işğal altında olan torpaqlarını hərbi yolla azad etmək variantıdır. Bu, tamamilə mümkün olan məsələdir. Azərbaycan torpaqlarını heç vaxt Ermənistana güzəştə getməyəcək. Ermənistan bunu yaxşı bilir".

Millət vəkilinin sözlərinə görə, erməni politoloqunun təklifi növbəti siyasi təxribatdır.: "Ancaq İran çətin ki, buna getsin. Ermənistan vaxtaşırı digər dövlətləri, beynəlxalq təşkilatları özünün çirkin siyasi məqsədlərinə qatmaq istəyir. Amma hesab edirəm ki, İran Ermənistanın bu oyunlarına getməyəcək. Ermənistan isə Azərbaycanın ərazi bütövlüyünə hörmət etmək barədə çox ciddi düşünməlidir".

Xatırladaq ki, Naxçıvanda "Sarsılmaz qardaşlıq-2019" Azərbaycan-Türkiyə birgə döyüş atışlı taktiki təlimi başlayıb. Təlimə 5000 nəfərədək şəxsi heyət, 200-dən artıq tank və digər zirehli texnika, 180-ə yaxın müxtəlif çaplı raket və artilleriya qurğusu, yaylım atəşli reaktiv sistemləri və minaatan, 21 ədəd təyyarə, helikopter, pilotsuz uçuş aparatı və silahlanmaya yeni daxil edilmiş müxtəlif növ müasir silah və texnika nümunələri cəlb olunub.

Təlimin məqsədi qərargahların müştərək döyüş əməliyyatları planlarının hazırlanması, şəxsi heyətin peşəkarlıq səviyyəsinin artırılması və birgə tapşırıqları icra etmək vərdişlərinin inkişaf etdirilməsi ilə Azərbaycan və Türkiyə hərbi bölmələrinin qarşılıqlı fəaliyyətinin koordinasiyasına nail olmaqdır. "Sarsılmaz qardaşlıq-2019" Azərbaycan-Türkiyə birgə döyüş atışlı taktiki təlimi iyunun 11-dək davam edəcək.

Məftun Salmanov

Telegramda izləyin

instagramda izləyin