Lombarda üz tutanların NƏZƏRİNƏ! Artıq sizi aldada bilməyəcəklər – Deputat ŞƏRTLƏRİ AÇIQLADI

"Lombarda girov qoyub pul götürən insanlar sığorta olunmalıdır ki, sonradan heç bir problemlə üzləşməsinlər. Lombardların özləri də sığortalanmalıdır. Çünki lombard adı gələndə istənilən adam onun barəsində mənfi fikir söyləyir". Bunu Sonxeber.az-a Milli Məclisin deputatı Rüfət Quliyev parlamentdə müzakirəyə çıxarılmış "Lombardlar haqqında" qanun layihəsinə münasibət bildirərkən deyib.

Onun sözlərinə görə, "Lombardlar haqqında" qanun layihəsi lombardların fəaliyyətini tənzimləmək baxımından böyük addımdır: "Lakin qanun layihəsi millət vəkillərinə komitə iclasından bir gün əvvəl təqdim olunub. Deputatların qanun layihəsini oxumağa imkanları olmamışdı. Layihə barədə Maliyyə Bazarlarına Nəzarət Palatasının Hüquq və icraat departamentinin direktoru Əfqan Baxışov plenar iclasda qısa məlumat verdi. Onun məlumatından sonra birinci çıxış edən mən özüm oldum. Deputatların əksəri mənim çıxışımı dəstəklədi".

R. Quliyev qanun layihəsində bəzi bəndlərin əlavə edilməsini təklif edib: "Birincisi, qanun layihəsində nəzərə alınmalıdır ki, lombardlara daha çox imkansız adamlar gedir. İmkanlı adamlar lombardlardan adətən istifadə etmirlər, onlar pul almaq üçün daha çox banklardan kredit götürməyə üstünlük verirlər. Qanunda elə bir bənd olmalıdır ki, insanlar əsasən qızıl və zinət əşyalarını, bəzən daşınan və daşınmaz əmlaklarını girov qoyaraq qısa müddət zaman kəsiyi – bir neçə gün, 1 həftə, yaxud 1 ay - üçün lombardlardan pul götürsünlər.

İkincisi, girov qoyub pul götürən insanlar sığorta olunmalıdır ki, sonradan heç bir problemlə üzləşməsinlər. Lombardların özləri də sığortalanmalıdır. Çünki lombard adı gələndə istənilən adam onun barəsində mənfi fikir söyləyir. Təbiidir ki, lombardlar qeyri-bank sektorunda olan lazımi maliyyə qurumlarıdır. Lombardların tarixi minilliklə ölçülür və demək olar hər yerdə fəaliyyət göstərirlər.

Üçüncüsü, lombardlarda əşyalara, əmlaklara qiymət qoyulanda isə sosial və maliyyə baxımından ədalətli qiymət qoyulmalıdır. Bəzən insanlar pulu gətirib girov qoyduğu qızıl-zinət əşyalarını götürmək istəyəndə lombardlar guya həmin əşyaların satdıqlarını deyirlər, ya da daş-qaşların dəyişdirilməsi ilə halları ilə üzləşirlər. Bunların hamısı dələduzluqdur və cinayət məcəlləsinə uyğun cəza verilməlidir.

Dördüncüsü, bəzən isə insanlar pulu verib əşyalarını götürmək istəyəndə lombardların bağlı olmasını və ya müflis olmasını görürlər. Bu artıq məsuliyyət məsələsidir. Buna görə qanunda göstərilməlidir ki, lombard hüquqi və qanuni məsuliyyət daşıyır. Lomabrdın yerinin və ya sahibinin dəyişməsi onun məsuliyyətdən qaçması üçün bəhanə sayıla bilməz. Girov qoyub pul götürən insan üçün bunun heç bir aidiyyəti yoxdur.

İstəyimiz odur ki, qanun layihəsi mükəmməl olsun, oradan iki məna çıxmasın, insanlar üçün rahat olsun, onlar öz haqlarını bilsinlər. İnsanlar əmin olmalıdırlar ki, lombardlar onları aldatsalar, lombard sahibləri cinayət məsuliyyətinə cəlb olunacaqlar. Lombardların başında işbazların durmasına imkan vermək olmaz.

Azərbaycan iqtisadiyyatı inkişaf etməkdədir, bir sıra sosial layihələr, islahatllar həyata keçirilir və ölkədə sosial yönümlü siyasət yeridilir. Bu baxımdan lombardların fəaliyyəti inkişafla ayaqlaşmalı və orta və aşağı təbəqədən olan insanların maraqlarına xidmət etməlidir".

Məftun Salmanov

Telegramda izləyin

instagramda izləyin