Kirayə mənzil bazarında bahalaşmanın səbəbləri- Ekspertdən açıqlama

Yay fəslində durğunluq müşahidə edilən kirayə mənzil bazarında sentyabr ayından etibarən canlanma müşahidə olunur. Bunun əsas səbəbi dərslərin başlaması ilə əlaqədar olaraq tələbələrin paytaxta gəlməsidir. Xüsusilə metrostansiayaların yaxınlığındakı ərazilərdə bahalaşma daha çox hiss olunur. Kirayə mənzil axtarışında olanlar büdcələrinə uyğun ev tapmaqda çətinlik çəkirlər.

Mövzu ilə əlaqədar Sonxeber.az-a açıqlama verən daşınmaz əmlak bazarı üzrə ekspert Nazir Mehdiyev bildirib ki, əslində tələbələrin paytaxta gəlməsinin kirayə mənzillərin qiymətinin qalxmasına təsiri yoxdur:
" Onsuz da yay mövsümündə aşağı düşən qiymətlər sentyabr ayından qalxmağa başlayır və kirayə mənzil bazarında canlanmaya səbəb olur. Lakin hazırda qiymətlərin qalxmasına ciddi təsir edən amillərdən biri pilot layihələr çərçivəsində həyata keçirilən söküntülərdir. Binaları sökülən vətəndaşlar məcburi olaraq kirayələrdə yaşayırlar. Bu da bazarda tələbatın artımına səbəb olur ".
Nazir Mehdiyevin sözlərinə görə, qiymət artımlarını normal qəbul etmək lazımdır:
"Bazarda qiymətlər tələbata uyğun olaraq formalaşır. Tələbat artdıqca, qiymətlər də bahalaşır. Ötən il 400 azn-ə olan evlər bu il 500-550 azn-ə təklif olunur. Çünki, müraciət edənlərin sayı da çoxdur ".
Ekspertin sözlərinə görə, kirayə mənzil bazarında qiymətlər mənzilin şəraiti və yerləşdiyi əraziyə əsasən müəyyən olunur:
"İçində əşyası olmayan və şəraiti nisbətən zəif olan evlər daha ucuz qiymətə təklif olunur. Hazırda qiymətinə görə ən ucuz mənzillər Bakıətrafı ərazilərdə müəyyən olunub ".

Lamiyə Məmmədova

Telegramda izləyin

instagramda izləyin