Oğlan yoxsa Qız olsun? – Nazirlik körpənin cinsiyyət fərqini aradan qaldırmaq üçün "Milli Faliyyət Planı" hazırladı
Xəbər verdiyimiz kimi, tarixən Azərbaycan ailəsində cins nisbəti, yəni qız və oğlan uşaqlarının doğumu müzakirə mövzusu olub. Nə qədər müasirləşsək də, ailə dəyərlərimizə yapışan bu ayrı-seçkiliyi təmizləyə bilmirik. Ekspertlər bu məsələnin gələcəkdə qadın çatışmazlığı kimi demoqrafik problem yarada biləcəyini deyir.
Mövcud vəziyyətlə dair Sonxeber.az-ın suallarını Əmək və Əhalinin Sosial Müdafiəsi Nazirliyi cavablandırıb. Nazirlikdən bildirilib ki, doğulanlar arasında cins nisbətinin pozulmasının davamlı hal alması gələcəkdə demoqrafik inkişaf proseslərinə öz mənfi təsirini göstərə bilər:
"Ailələrdə doğulan uşaqlar arasında cins baxımından həm oğlan, həm də qıza eyni, bərabər yanaşmanın olması, bu sahədə qız uşağına nisbətən oğlan övladlarına verilən üstünlüyün azaldılması lazımdır. Azərbaycan Hökuməti bu problemin aradan qaldırılması üçün beynəlxalq təşkilatları, vətəndaş cəmiyyətinin nümayəndələrini və elmi-tədqiqatçıları cəlb edir. Problemin tezliklə aradan qaldırılması üçün birgə səyləri səfərbər edib zəruri addımlar atır".
Nazirlikdən verilən məlumatda qeyd edilir ki, Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyevanın tapşırığı ilə Əmək və Əhalinin Sosial Müdafiəsi Nazirliyi tərəfindən "Azərbaycanda doğulacaq uşağın cinsinin seçilməsinin qarşısının alınmasına dair 2019-2022-ci illər üçün Milli Fəaliyyət Planı" hazırlanıb. BMT-nın Əhali Fondunun dəstəyi ilə hazırlanan bu Milli Fəaliyyət Planı aidiyyəti orqanlarla razılaşdırılaraq artıq Hökumətə təqdim olunub:
"Doğulanlar arasında cins nisbətinin pozulmasının qarşısının alınması üçün Planda aidiyyatı dövlət orqanları, sosial tərəfdaşlar, qeyri-hökumət təşkilatları və vətəndaş cəmiyyəti ilə birgə həyata keçiriləcək kompleks tədbirlər əksini tapır".
Nazirlikdən bildirilib ki, Azərbaycanda yeni doğulmuş körpələr arasında oğlanların payının davamlı artımı 1990-cı illərdən başlayaraq özünü göstərib:
"2000-ci ildə doğulanlar arasında hər 100 qıza 115 oğlan düşürdüsə, 2003-cü ildə isə bu göstərici 118-ə çatıb, 2017-ci ildə 114-ə enib, 2018-ci ildə isə yenidən 115 təşkil edib".
Nazirliyin məlumatında eyni zamanda bəzi iqtisadi rayonlarda respondentlərdə doğum ardıcıllığına görə 2-ci uşaqlar arasında cins nisbəti pozulmasa da, doğulan 3-cü uşaqlar arasında cins nisbəti pozulduğu qeyd edilib:
"2015-2017-ci illərdə Azərbaycanda reproduktiv davranışın xüsusiyyətlərinin qiymətləndirilməsi məqsədi ilə 3 iqtisadi rayonda (Şəki-Zaqatala, Aran və Lənkəran) 15-49 yaşlı qadınlar arasında aparılmış sorğu zamanı müəyyən edilib ki, ailədə qız və oğlan uşaqlarının sayı onların müvafiq doğum ardıcıllığına görə dəyişir".
Şəlalə Babayeva
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş