Qazlı və qazsız suların qiyməti tənzimlənən mallara aid deyil- Qiymət fərqləri ilə bağlı RƏSMİ AÇIQLAMA

Xəbər verdiyimiz kimi, küçələrdə, mağazalarda, xüsusən köşklərdə satılan qazlı və qazsız içməli suların qiymətləri bir çox hallarda şişirdilmiş olur. Ekspertlər bu qiymət fərqini benzin və dizel yanacağı ilə muqayisə edərək, qiymətin anormal olduğunu iddia edirlər. Təbii ki, bu mallara tələbat olduğu üçün adlarını çəkdiyimiz yerlərdə insanlara daha baha qiymətlərə təklif edilir. Bəs, maraqlıdır, bu qiymətlər bazar mühitində hansı əsaslarla artırılır və buna qarşı nə kimi tədbirlər görülür?
Bununla bağlı Antiinhisar Siyasəti və İstehlakçıların Hüquqlarının Müdafiəsi Dövlət Xidməti Sonxeber.az-ın suallarını cavablandırıb:

"İstehlak bazarında sahibkarlar tərəfindən istehlakçılara müxtəlif qiymət və şərtlərlə mal və xidmətlər təklif olunur. İstehlakçı onların arasından qiyməti və istehlak xassələri daha uyğun olan malı və ya xidməti öz ehtiyacına və zövqünə görə sərbəst seçərək ala bilər".

Qurumdan verilən məlumata əsasən, tələb və təklif vətəndaş və satıcı arasında deyil, həmin məhsulu bazara təklif edən sahibkar və istehlakçı arasında tənzimlənir. Qeyd edək ki, suallarımıza da məhz bu müstəvidə cavab verilib:

"Qazlı və qazsız içməli suların qiymətləri tənzimlənən mallara aid deyil və satış qiymətləri tələb-təklif əsasında rəqabət mühitində formalaşır. Bununla belə, istehlak bazarında baş verə biləcək süni qiymət artımının vaxtında müəyyən edilməsi və qarşısının alınması məqsədi ilə Antiinhisar Siyasəti vəİstehlakçıların Hüquqlarının Müdafiəsi Dövlət Xidməti tərəfindən qabaqlayıcı tədbirlər həyata keçirilir".

Şəlalə Babayeva

Telegramda izləyin

instagramda izləyin