Ziyafət Əsgərov Qüdrət Həsənquliyevə irad bildirdi: "Çalışın, xahiş edin"

"Əgər vəzifəli şəxs qanuni vəzifələrini yerinə yetirmirsə, deməli, həmin vəzifəyə layiq deyil. Bu yaxınlarda Cənab Prezident keçirilən müşavirədə bildirdi ki, büdcədə bəzi sahələr üzrə xərclər məqsədyönlü şəkildə şişirdilir. Gərək biz Milli Məclis olaraq xərclərin şişirdilməsinin qarşısını alaq".
Sonxeber.az-ın məlumatına görə, bunu millət vəkili Qüdrət Həsənquliyev Milli Məclisin bu gün keçirilən iclasında "Büdcə sistemi haqqında" qanuna dəyişikliyin müzakirəsi zamanı deyib.
"Bəzən Nazirlər Kabinetindən parlamentə göndərilən sənədlər tam göndərilmir. Ona görə də Milli Məclisdən tələb və xahiş edirəm ki, Nazirlər Kabineti qarşısında parlamentə göndərilən sənədlərin hamılıqla təqdim olunması tələbi qoyulmalıdır. Həmçinin Hesablama Palatası dəqiq göstərsin ki, tikiləcək obyektlər neçəyə başa gələcək, göstərilməlidir. Hər kəs bu işdə Prezidentə kömək etməlidir. Həmçinin Milli Məclis bu işdə üzərinə düşən vəzifələri layiqincə yerinə yetirilməlidir", - deyə millət vəkili bildirib.
Milli Məclisin birinci müavini və iclasa sədrlik edən Ziyafət Əsgərov isə onun bu çıxışına reaksiya verib:
"Qüdrət müəllim, siz Milli Məclisdən tələb etdiniz, Milli Məclis sizin xahişinizi yerinə yetirmədi, onda hansı hüquqi hərəkəti edəcəksiniz? Ona görə çalışın, xahiş edin!"
Qüdrət Həsənquliyev Əsgərova "Əgər vəzifəli şəxs qanuni vəzifələrini yerinə yetirmirsə, deməli, həmin vəzifəyə layiq deyil!" cavabını verib.

Telegramda izləyin

instagramda izləyin