Manatın məzənnəsində dəyişiklik olacaq? – Ekspertdən açıqlama

Bu gün ABŞ-ın Federal Ehtiyat Sistemi (FED) uçot dərəcəsi ilə bağlı yeni qərarını açıqlayıb.

Sonxeber.az xəbər verir ki, qərara əsasən, uçot dərəcəsi 1,5-1,75%-ə qədər endirilib.

Xatırladaq ki, bir qədər əvvəl FED uçot dərəcəsini 0,25 faiz bəndi azaldaraq 2,25-2,5%-dən 2-2,25%-ə endirib.

Maraqlıdır, qərarın dünya bazarına, eləcə də milli valyutamıza təsiri olacaqmı?

Bununla bağlı Sonxeber.az-a açıqlama verən iqtisadçı Natiq Cəfərli bildirdi ki, FED-in bu addımı siyasi basqının nəticəsi və dünyada davam edən valyuta müharibələrinin bir təkib hissəsi də ola bilər. Çünki güclü və böyük dövlətlər çalışırlar ki, öz milli valyutalarını zəiflətsinlər, yəni ucuzlaşdırsınlar ki, ixracatda üstünlük qazansınlar.

"Son zamanlar Çin yuanı tarixində dollar qarşısında ən aşağı məzənnəyə endi. Bu da Çinin müəyyən üstünlük qazanmasına səbəb olurdu. Ona görə də, ABŞ prezidenti dəfələrlə FED-ə çağırış etdi ki, faizləri daha kəskin endirsin və bununla növbəti endirim müşahidə olundu. Ona görə də, dünyada dollar indeksinin zəifləməsi, dollar məzənnəsinin aparıcı valyutalar qarşısında ucuzlaşmasının dünəndən bəri şahidiyik. Düzdür, ucuzlaşma o qədər kəskin deyil, təqribən 0,60-0,70 faiz civarındadır. Lakin bu da dünya bazarlarında kifayət qədər ciddiyə alınacaq həddir. Düşünürəm ki, bu, Amerikanın valyuta müharibələrində önə çıxma cəhdidir".

Gedən proseslərin manata təsiri məsələsinə münasibət bildirən ekspert qeyd etdi ki, bunun Azərbaycana heç vaxt birbaşa təsiri olmayıb, bu gün də yoxdur.

"Ümumiyyətlə, Azərbaycanda məzənnə inzibati qaydada tənzimlənir. Bazar iqtisadiyyatı qaydaları tətbiq olunmayıb. Hətta Mərkəzi Bank uzun zaman bunu etiraf etməkdən çəkinsə də, son açıqlamalarında artıq məzənnənin inzibati qaydada tənzimləndiyini etiraf etməyə məcbur oldu və Azərbaycanda tənzimlənən məzənnə rejiminin olduğu rəsmi dairlər tərəfindən təsdiqləndi. Ona görə də, dünya maliyyə bazarlarında gedən proseslərin bizim məzənnəyə heç bir təsiri olmayıb".

Azərbaycan manatına təsir edə biləcək yeganə amilin neft qiymətləri olduğunu bildirən mütəxəssis neftin qiymətində kəskin dəyişiklik olmayacağı təqdirdə milli valyutanın sabit qalacağını qeyd etdi.

"Nə qədər ki, neftin qiyməti 60 dollardan yuxarı və ya o civardadır, ciddi basqıların olacağını düşünmürəm. Amma neftin qiymətində növbəti ucuzlaşma olsa, o zaman məzənnəyə müəyyən basqıların olması və dəyişiklik istisna olunmur".

Məleykə Ağasoy

Telegramda izləyin

instagramda izləyin