"Azərbaycan nefti Avropanın enerji təhlükəsizliyində böyük rol oynayır" - Fəzail Ağamalı
Məlum olduğu kimi, 1949-cu il noyabrın 7-də Bakıda, Neft Daşlarında ilk neft fontanının vurması və dünya təcrübəsində birinci dəfə açıq dənizdə neft hasilatına başlanması neft sənayesinin inkişafında mühüm hadisədir. Bu məhz Azərbaycan neftçilərinin fədakar əməyi sayəsində, dənizdə neftçıxarmanın mümkünlüyü ideyası ilə gerçəkləşdi.
Bununla bağlı Sonxeber.a- danışan deputat Fəzail Ağamalı gərgin əməkləri nəticəsində Azərbaycanın abadlaşmasında xidməti olan neftçilərin rolunu yüksək qiymətləndirib və bu sahədə çalışanları təbrik edib:
"Mən bu əziz bayram münasibəti ilə çox böyük məmnuniyyətlə fədakar neftçilərimizi səmimi qəlbdən təbrik edirəm, onlara möhkəm can sağlığı, olduqca çətin işlərində böyük uğurlar arzu edirəm. Azərbaycan neftçilərinin zəngin tarixi var. XIX əsrin sonlarından başlayaraq sənaye üsulu ilə Bakıda ilk dəfə olaraq neft istehsalı başlanıldı. Keçən zaman kəsiyində bütövlükdə Azərbaycan əsasən neft ölkəsi kimi tanındı. Biz nəinki vaxtı ilə çar Rusiyasının, həm də daha sonra Sovet İttifaqının neft və neft məhsullarına olan ehtiyacını ödəyirdik. Həmçinin dünyanın ayrı-ayrı yerlərində Azərbaycan neftçiləri qazanmış olduqları bilik və təcrübə əsasında neft yataqlarının kəşfiyyatında və istismarında çox ciddi rol oynayırdı".
Deputat Azərbaycana müxtəlif dövlətlərin öz mütəxəssislərini yetişdirmək üçün gəncləri Bakıya və SSRİ məkanında yeganə iddiali ali məktəb olan Neft Akademiyasına göndərdiklərini qeyd edir. Bu da neft sənayemizin vermiş olduğu uğurdur. O, həmçinin neftin dünya bazarına çıxarılmasından və bunun üçün atılan mühüm addımlardan da söz açıb:
"Müstəqillik dövründə Ulu Öndərimizin iradəsinin nəticəsi olaraq biz neft sənayemizin yeni inkişaf mərhələsinə qədəm qoyaraq 1994-cü il senytyabrın 20- də "Əsrin müqaviləsi" imzalandı və Azərbaycan neftinin dünya bazarına çıxarılmasının hüquqi əsası qoyuldu. Bu müqaviləyə söykənərək Prezident İlham Əliyevin hakimiyyətinin ilk illərində Bakı- Tbilisi-Ceyhan neft boru kəməri istismara verildi, ölkəmizin istehsal olunan nefti təhlükəsiz şəkildə dünya bazarına çıxarıldı. Bu kəmərə Qazaxıstan Respublikası da qoşulub. Bu dövlətin də nefti həmin kəmərlə dünya bazarına çıxarılır. Neftçilərimizin səyi və fədakar əməyi nəticəsində Azərbaycan həm də artıq istehsal və ixrac edən ölkəyə çevrilib. Düşünürəm ki, Azərbaycan nefti Avropanın enerji təhlükəsizliyində böyük rol oynayır."
Deputat Fəzail Ağamalı insanlarımızın həyat səviyyəsinin yaxşılaşmasında, həm milli, həm transmilli layihələrin reallaşdırlmasında neftdən əldə edilmiş gəlirlərin son dərəcə ciddi yeri və önəmi olduğunu vurğulayıb:
"Bu gün bizim 50 milyarda yaxın valyuta ehtiyatımız var. Bu da məhz bizim neftdən gələn gəlirimizin hesabına toplanıb və Azərbaycanın çox böyük üstünlüyüdür. Bir sözlə, Azərbaycan neftçiləri Azərbaycanın təbii sərvətlərini xalqımıza və dünyaya təqdim etməkdə davam edirlər".
Deputat eyni zamanda Azərbyacanın Sovet hökumətindəki dövrdən bəri neft ölkəsi kimi tanındığını və Qroznı şəhərində də neft sənayesi yarandığını qeyd edərək, sonralar orda istehsal olunan neftə görə Qroznıya ikinci Bakı deyildiyini də bildirib:
"Azərbaycan neft məktəbinin çox böyük nümayəndəsi olan Fərman Salmanovun bu gün Rusiyaya müstəsna gəlirlər gətirən "sibir nefti"-nin kəşfində oynamış olduğu rolu unutmaq olmaz. Bu, Azərbaycan neftinin birbaşa mahiyyətinə və məntiqinə söykənmiş olan ciddi bir faktdır. Bakı nefti faşist Almaniyası üzərində qələbəmizdə müstəsna xidmətlər göstərdi. Bu da tarixi faktdır".
Şəlalə Babayeva
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş