Dağlıq Qarabağ münaqişəsinin həllində açar rolda kimdir? – Politoloqdan açıqlama

Politoloq : "Rusiyada bəzi qüvvələr düşünürlər ki, münaqişə vasitəsilə dondurulmuş şəkildə həm Ermənistana, həm də Azərbaycana təsir edə bilərlər".

Dağlıq Qarabağ münaqişəsi 1992-ci ildən başlayaraq həlli bir müəmmaya çevrilən məsələyə dönüşüb.

İllərdir həmsədr ölkələrin bitib-tükənməyən səfərləri, Rusiyanın məsələnin həllində atdığı "addımlar" məsələnin həllində bir yol açmayıb.

İllərdir görünüşdə məsələnin həlli istiqamətində fikir mübadiləsi aparıldığı manipulyasiyası yaradılır.

Qarabağ münaqişəsinin həlli istiqamətində irəliləyişə nail olmaq üçün bir çox təkliflər irəli sürülür. Bir qisim mütəxəssis düşünür ki, bu münaqişənin həllində açar rolu Rusiya oynayır və məsələnin həlli onsuz mümkün deyil.

Bu fikirlərə aydınlıq gətirən politoloq Elxan Şahinoğlu Sonxeber.az-a bildirdi ki, aprel savaşı göstərdi ki, ölkəmizə müdaxilə edən qüvvələr hələ də var.

"Əgər biz təkbaşın vuruşa bilsəydik, bir aya Qarabağı geri qayatara bilərdik. Amma 4 günlük savaşdan sonra göründü ki, nə ABŞ, nə də Fransa bizə təzyiq etmədi, yenə də burada əsas qüvvə Rusiya oldu. Rusiya hər zamanki kimi məsələyə qarışaraq münaqişənin həllində yeniliyə nail olacağımızla bağlı vədlər verdi. Nəticə isə hələ də eyni yerdə olmağımızdır".

Politoloq onu da əlavə etdi ki, Rusiya münaqişənin həllində maraqlı deyil:

"Rusiyada müəyyən mərkəzlər münaqişənin həllində maraqlı deyillər. Düşünürlər ki, münaqişə vasitəsilə dondurulmuş şəkildə həm Ermənistana, həm də Azərbaycana təsir edə bilərlər. Bu baxımdan məsələni Rusiyasız həll etmək çətindir. Əgər Rusiyanın marağı olsaydı, öz təsiri altında olan Ermənistana deyə bilərdi ki, münaqişə həll olunsun. Çünki münaqişənin həlli hər kəsin xeyirinədir. Bu Rusiyanının da bölgə də nüfuzunun artmasında müstəsna rola malikdir. Amma çox təəssüf ki, Rusiyadakı bəzi siyasi mərkəzlər fərqli düşünürlər. Köhnə imperiya düşüncəsi olan "parçala və hökm sür" düşüncəsi ilə hərəkət edirlər. Biz buna baxmayaraq öz işimizi görməliyik. Hərbi qüdrətimizi artırmalı, ordumuzu gücləndirməli, imkan tapan kimi yenidən bu məsələni öz bildiyimiz kimi həll etməyin yollarını tapmalıyıq".

Telegramda izləyin

instagramda izləyin