Fazil Mustafa: "Qəlyan təklif edən məkanların öhdəsindən gəlmək mümkünsüz hala çevrilib"

Orta Şərq və Cənubi Asiyaya xas ənənəvi bir tütünçəkmə vasitəsi olan qəlyanın istifadəsi hazırda dəb halını alıb. Addımbaşı qəlyan təklif edən obyektlərə- çayxanalar, kafe və restoranlara rast gəlirik. Gənclərin siqaret qədər müraciət etdikləri ikinci vərdiş sulu qəlyandır. Bir çox gənc isə bunun ziyansız olduğunu düşünür. Alma, banan, nanə kimi konservantlarla "zənginləşdirilən" qəlyanlar xüsusən siqaret çəkməyənlərin hobbisinə çevrilib. Bəs qəlyançəkmənin bir yaş məhdudiyyəti varmı? Orqanizim üçün nə kimi zərərləri var?
Mövzu ilə əlaqədar Sonxeber.az-a açıqlama verən terapevt Süleyman Camalov qəlyançəkmənin tütünçəkmənin bir növü olduğunu bildirib:
"Tütünçəkmə, zərərli vərdiş olmaqla bərabər, müasir təbabətdə xəstəlik olaraq qəbul edilməkdədir. Klassik siqaretçəkmə ilə müqayisədə, qəlyanda filtr rolunu su sütunu oynayır. İstənilən halda tütünçəkmə orqanizmə böyük zərər verir və qəlyançəkmə bunların arasında ən təhlükəlilərindən biridir. Birmənalı olaraq heç bir faydası yoxdur.Ümumiyyətlə, tütünçəkməyə qoyulan məhdudiyyət eyni ilə qəlyançəkmə üçün də tətbiq edilməlidir. Bu anlamda, uşaq yaş qrupu, hamilə qadınlar, ürək-qan damar sistemi və tənəffüs sistemi xəstələri xüsusi risk qrupuna daxildir. Xüsusən analar buna diqqət etməli, azyaşlı uşaqları ilə qəlyan çəkilən məkanlara getməməlidirlər. Uşaq orqaniziminin daha zərif olduğunu nəzərə alsaq, qəlyanın tüstüsünün balacaların bədəni üçün nə qədər təhlükəli olduğunu anlayarıq".
Deputat Fazil Mustafa bildirib ki, qəlyan təklif edən məkanların öhdəsindən gəlmək mümkünsüz hala çevrilib:
"Yaşı 18-dən az olan şəxslərin qəlyan çəkməsi qadağandır. Bundan əlavə, qəlyanın yalnız açıq məkanlarda çəkilməsinə icazə verilir. Məktəblərə yaxın məkanlarda qəlyanın təklif olunması yolverilməzdir. Lakin qadağaların qoyulmasına baxmayaraq, buna əməl edən yoxdur".

Telegramda izləyin

instagramda izləyin