"Mənə deyirlər ki, gəlib bağlamanızı götürməsəniz, atacağıq" -Azərpoçtdan şikayət

"Bağlamam gəlib amma mənə 90 gün sonra xəbər verilir".

Tez – tez mediada "Azərpoçt"un fəaliyyəti ilə bağlı bu cür xəbərlər yer alır. Sosial şəbəkələrdə vətəndaşlar "Azərpoçt"un fəaliyyəti ilə bağlı bu səpikidə şikayətlər edirlər.

Aytac Məmmədova adlı vətəndaşın şikayəti bundan ibarətdir ki, ona gələn bağlamadan 90 gün sonra xəbər tutub.

"Dünən 14 nömrəli poçtdan mobil nömrəmə zəng gəlib. Mənə deyirlər ki, gəlib bağlamanızı götürməsəniz atacağıq. Mən də dedim ki, bağlama çatan kimi mənə məlumat verilməli idi. Mən hazırda bağlamanı götürə bilməyəcəm, çünki işləyirəm və oxuyuram. Mənə bağlamanı götürmək üçün müəyyən vaxt verilməlidir. Cavabında isə deyildi ki, bu sizin probleminizdir. Gəlib götürməsəniz, geri göndərəcəyik".

Daha bir şikayət isə Elvin Zeynalov adlı şəxsdəndir. Vətəndaşın şikayəti 14 nömrəli poçtdandır.

"Baş Pasport, Qeydiyyat və Miqrasiya idarəsinin MAPS şöbəsinə ünvanlanan sorğunu Bakıdakı 14 saylı poçt şöbəsi 7 gün saxladıqdan sonra ünvana çatdırıb. "Azərpoçt"un bu cür davranışı məhkəmədə iddia qaldırılmasını ləngidib".

Kamran Həsənov adlı digər bir istifadəçi "Azərpoçt"un onun bağlamasını gecikdirməsindən şikayət edib.

""Azərpoçt"un ölkəyə gələn bağlamaları ünvana çatdırmağı kimi xaricə göndərilən bağlamaları çatdırması da zibil günündədir. 20 sentyabrda Çinə 6 ədəd bağlama göndərmişəm. Çinə hamısı çatdırılıb ancaq bu 6 bağlamadan biri lazım olan ünvana gedib digər 5 bağlama bir nöqtədə ilişib qalıb, bağlamaları götürməli olan şəxs isə onları ala bilmədiyini deyir. "Azərpoçt"un özünə 20 gün olar məlumat vermişəm problem, ancaq hələ heç bir xəbər yoxdur. Bu yarıtmaz qurumun bir səlhaiyyətli şəxsi yoxdurmu ki, dərdimizi deyək problemi həll etsinlər. Qaynar xəttdə oturanlar onsuzda bir kömək olmurlar, mənim izləmədə görə biləcəyim məlumatı, məndən izləmə nömrəsin soruşub özümə cavab kimi deyirlər. Problemimi ümumiyyətlə anlamırlar ya da özlərini anlamazlığa qoyublar".

Məsələ ilə əlaqədar "Azərpoçt"un qaynar xətti ilə əlaqə saxladıq. Şikayətlə bağlı suallarımızı cavablandıra biləcək şəxsə yönləndirməsini istəsək də, belə bir şəxsin olmadığını, nömrə əvəzinə poçtlarına bununla bağlı mesaj yazmamızı istədilər.

Telegramda izləyin

instagramda izləyin