Bakı Beynəlxalq Avtovağzal Kompleksində bilet tapılmır- Şikayət

Hər il müşahidə olunan standart mənzərə- Bakı Beynəlxalq Avtovağzal Kompleksində bilet tapılmazlığı bu günlərin aktual mövzusuna çevrilib. Bir neçə günlük istirahətini rayonda ailəsi, qohumları ilə qeyd etmək istəyənlərin sayca çox olması avtovağzalda sıxlıq yaradır. Belə ki, Nar Festivalı münasibəti ilə Göyçaya və Bayraq Günü ilə əlaqədar olaraq 3 günlük tətilə görə digər rayonlara üz tutan sərnişinlər təəssüf ki, avtovağzalda gediş üçün bilet tapa bilmirlər.
Bununla bağlı Sonxeber.az-a şikayət daxil olub. Sərnişinlər şikayət edərək bildirib ki, xəbər proqramlarında bayram günlərini nəzərə alıb avtobus reyslərinin sayının artırıldığı deyilsə də, əslində bilet tapmaq problem olaraq qalır:
"Əlavə reyslər açılacaq demişdilər, lakin yoxdur. Haradadı xəttə buraxılan əlavə avtobuslar? Haradadı müntəzəm hərəkət edən avtobuslar? Niyə xəttə buraxılmır? Qaynar xəttlə əlaqə saxlayıram, deyirlər, heç bir şey dəqiq deyil. Dəqiq olan odur ki, millət işindən-gücündən qalır. Göyçaya bilet almaq üçün 20 dəqiqə növbədə durandan sonra məlum oldu ki, bilet yoxdur. Mən də qeyri-qanuni-biletsiz gedən avtobusla rayona getməli oldum".
Sözügedən şikayətlə bağlı Bakı Beynəlxalq Avtovağzalının Təklif və Şikayətlər üzrə məlumat mərkəzinin operatoru Gülanə Aslanova bilet çatışmazlığı məsələsinə belə aydınlıq gətirib:
"Məlumdur ki, bayramla əlaqədar xeyli sayda vətəndaş rayonlara üz tutur, sərnişin sayı həddindən artıq çox olur. Buna görə, biz hər kəsə tövsiyə edirik ki, bileti ya onlayn, ya da kassadan bir neçə gün, heç olmasa bir gün öncə alsınlar. Biz internet səhifəmizdə də bu haqda elan qoyuruq. Hərdən olur ki, vətəndaş səfərə 30 dəqiqə qalmış gedir avtovağzala, bilet tapa bilmir və bu cür hallarla üzləşir. Çünki biletlər durmadan alınır. 30 dəqiqəlik intervalla istənilən bölgəyə avtobuslar çıxır. Biletin tapılmamağı real deyil".

Lamiyə Məmmədova

Telegramda izləyin

instagramda izləyin