"Uşağı dilənçiliyə yaxın qohumları sövq edir"-Kəmalə Ağazadədən azyaşlı dilənçilərlə bağlı AÇIQLAMA
Xəbər verdiyimiz kimi, ötən günlərdə sosial şəbəkələrdə dilənçiliklə məşğul olan azyaşlı uşağın videosu yayılıb. Uşağın pul istədiyi avtomobilin sürücüsü görüntüləri çəkərək sosial şəbəkədə paylaşıb. Maraqlısı budur ki, videogörüntüyə düşən azyaşlı dilənçi uşağına bənzəmirdi və avtomobil sahibindən "Qurban olum ay əmi, bircə manat ver çıxım gedim" deyərək imdad diləyirdi.
Bununla bağlı Sonxeber.az- a danışan Azərbaycan Uşaqlar Birliyinin sədri Kəmalə Ağazadə açıqlamasında belə videolarla tez- tez qarşılaşdıqlarını və Daxili İşlər Nazirliyinin mütəmadi olaraq reydlər keçirərək səfil həyatı keçirən uşaqları araşdırdıqlarını deyib:
"Arada belə videoları mən də görürəm və qeyd edim ki, Daxili İşlər Nazirliyi səfil həyat tərzi sürən uşaqlarla bağlı mütəmadi olaraq reydlər keçirir və həmin uşaqları bu işə məcbur edən insanları inzibati qaydada cəzalandırır, cərimələyir və belə uşaqları müəssisələrə yönəldirlər. Bizə gələn uşaqların içərisində də Daxili İşlər Nazirliyinin yerli bölmələri tərəfindən aşkarlanan belə uşaqlar var.
Kəmalə Ağazadə qeyd edib ki, adətən belə uşaqların küçələrdə dilənçilik etməsi onlara havadarlıq edən şəxslər tərəfindən aparılır. O, həmçinin açıqlamasında uşağın diləndirilməsinin cinayət işi olduğunu və bu məsələdə iştirak edən şəxslərin birbaş cinayət məsuliyyəti daşıdığını deyib:
"Uşağı buna vadar edən özü deyil, onun düşdüyü mühitdir. Uşaqları bu işə daha çox himayədarları, valideynləri məcbur edir. Biz mətbuata belə hallarla bağlı çoxsaylı məlumatlar vermişik. Keçən il bir uşağı salfet satan yerdə görmüşdük. Biz həmin uşağı neçə ay izlədik və axırda məlum oldu ki, o uşağın arxasında bir qrup var. Həmin insanlar isə öz yaxın qohumlarıdır. Məsələ ilə bağlı İnsan Alverinə Qarşı Mübarizə Baş İdarəsinə müraciət etdik. Qeyd edim ki, həmin uşaq artıq sığınacaqda yerləşdirilib. Bildirim ki, uşağı bu kimi işlərə vadar edən insanlar bu gün məhkəmə qarşısına çıxırlar".
Azərbaycan Uşaqlar Birliyinin sədri Kəmalə Ağazadə həmçinin adı çəkilən videoya da münasibət bildirib:
"Cəmiyyətə üzümü tutub demək istəyirəm ki, həmin uşaqlar sizə deyəndə pul ver, verməyin! Əslində siz bu uşaqları dilənçiliyə sövq edirsiniz. Olmaz! Uşaq bu gün qəpiyə yaxın durmursa, bir azdan manata da yaxın durmayacaq, get- gedə başqa işlərə də sövq olunacaq, onu nələrəsə cəlb edəcəklər. Hər bir vətəndaşın borcu düşünürəm ki, belə uşaqları görən zaman mütləq hüquq- mühafizə orqanına zəng edərək məlumat verməkdir".
Şəlalə Babayeva
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş