"20 noyabr faciəsi Ermənistanın Azərbaycana qarşı faşizm siyasətinin təzahürüdür"- Millət vəkili
Bu gün Azərbaycan tarixinin ən faciəli hadisələrindən biri – Qarakənddə törədilən qətliamdan 28 il ötür. Xocavənd rayonunun Qarakənd kəndi üzərində "Mİ-8" vertolyotunun vurulması nəticəsində Azərbaycanın bir çox dövlət xadimləri və jurnalistlər həlak olublar. Həlak olanlar arasında dövlət katibi Tofiq İsmayılov, Baş prokuror İsmət Qayıbov, dövlət müşaviri, Daxili İşlər naziri general Məhəmməd Əsədov, millət vəkilləri Vaqif Cəfərov, Vəli Məmmədov, Baş nazirin müavini Zülfü Hacıyev, Prezident Aparatının şöbə müdiri, jurnalist Osman Mirzəyev, Qazaxıstan daxili işlər nazirinin müavini Sanlal Serikov, Azərbaycan Dövlət Televiziyasının jurnalisti Alı Mustafayev də var. Ümumilikdə qəza nəticəsində 22 nəfər həlak olub. Həlak olanlar sırasında vertolyotda Rusiya və Qazaxıstandan olan müşahidəçilər də vardı. Hadisədən 28 il keçməsinə baxmayaraq, indiyədək terror aktının üstü tam açılmayıb və ermənilərin azərbaycanlılara qarşı həyata keçirdiyi digər soyqırımlar kimi, bu cinayəti törədənlər də cəzasız qalıblar.
Bununla bağlı Sonxeber.az-a danışan deputat Cavid Osmanov bildirib ki, 28 il bundan öncə Azərbaycanın bir sıra dövlət orqanlarının rəhbərlərinin olduğu vertolyot Qarakənd üzərində olarkən separatçı Ermənistan tərəfindən vurulub: "Həmin təxribat zamanı vertolyotda olan bütün ziyalılarımız şəhid oldu. Təbii ki, bu Dağlıq Qarabağ münaqişəsi zamanı ölkəmizə qarşı növbəti bir təxribat idi. Vertolyotda həlak olanlar dövlətçiliyimiz naminə çalışan ziyalı insanlar idi. Ermənistan tərəfi yaxşı başa düşürdü ki, o insanların məhv edilməsi onlara yeni meydanlar açacaq. Ona görə də bu niyyətlərini həyata keçirdilər. 28 ildir ki, biz bu günü unutmuruq. Bu Ermənistanın Azərbaycana qarşı faşizm siyasətinin növbəti təzahürüdür. Təəssüf ki, bu günə kimi ermənilərə bizə qarşı törətdikləri vəhşiliklər və soyqırımlara görə heç bir cəza tədbiq olunmayıb".
Aysel Yusifqızı
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş