Bakıda tutuquşuların buraxıldığı parkdan - VİDEOREPORTAJ

Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə Bakının Atatürk prospektindəki parkda buraxılan tutuquşular sakinlərin marağına səbəb olub.

"Report"un çəkiliş qrupu tutuquşuların buraxıldığı parkdan reportaj hazırlayıb.
Burada tutuquşular qəfəsdə olmasına baxmayaraq, istədikləri vaxt açıq havada uça bilirlər. Qəfəsin qapısı bütün günü açıq olduğundan tutuquşular qidalandıqdan sonra açıq havaya çıxa bilir. Axşam saatlarında qəfəsdəki yuvalarına qayıdan tutuquşular yemlənir.
Parkın rəhbəri Fariz Sailov deyir ki, yaxalıqlı tutuquşular hər gün xüsusi qidalarla yemlənir. Onun sözlərinə görə, bu quşlar Bakı şəhərinin iqlim şəraitində yaşaya və çoxala bilən tutuquşu növüdür: "Quşlar istədikləri vaxt qəfəsə gəlib qidalanır və yenidən uçub gəzirlər. Bu həm də insanlara çox xoş gəlir".

Sakinlər isə, ümumilikdə, parkda yaradılan şəraitdən razı olduqlarını bildiriblər.
Qeyd edək ki, "Urban Ecology" ("Şəhər ekologiyası") layihəsi çərçivəsində Bakı və onun ətrafındakı ictimai yerlərin şəhər mühitində rahat yaşayıb çoxala bilən heyvan və quş növləri ilə zənginləşdirilməsini, eləcə də bu növlərin qorunub saxlanması istiqamətində ardıcıl tədbirlərin həyata keçirilməsini nəzərdə tutulur.

Vəhşi təbiətin qorunub saxlanması üzrə çoxşaxəli səylərlə yanaşı, Leyla Əliyevanın təşəbbüsü ilə şəhər mühitinə aid olan növlərin mühafizəsi istiqamətində də geniş tədbirlər həyata keçirilir. Bu xüsusda, Bakıda küçə heyvanlarının qorunmasına yönəlmiş IDEA Heyvanlara Qayğı Mərkəzi fəaliyyət göstərir, şəhərboyu pişiklər üçün xüsusi evciklər qurulur və digər işlər aparılır. Bütün bu səylərin əsas məqsədi şəhərdə yaşayan insanlarla ətraf mühit arasında ahəngliyin yaradılması, daha sıx və daha sağlam əlaqənin möhkəmləndirilməsidir.

Xatırladaq ki, keçmişdə Bakı şəhəri mühitində çoxsaylı sincab və tutuquşular məskunlaşıblar. Onlar parklarda və yaşıllıqlar mövcud olan digər ərazilərdə insanlar arasında sərbəst dolaşıblar. Lakin ötən əsrin sonlarında mövcud olan ekoloji problemlər səbəbindən bu növlərin sayı kəskin azalıb. Son illər ölkədə aparılan geniş yaşıllaşdırma və abadlaşdırma işləri, xüsusən də IDEA İctimai Birliyinin səyləri sayəsində Bakıda qanunsuz ağac kəsilməsi hallarının azaldılması və saysız-hesabsız yeni ağacların əkilməsi nəticəsində şəhərdə bir çox fauna növlərinin qaytarılması üçün münbit şərait yaradılıb.

Telegramda izləyin

instagramda izləyin