"Aparılan parlament islahatları eyni zamanda cəmiyyətin sosial sifarişidir"-RƏYLƏR
DünənYeni Azərbaycan Partiyası (YAP) Siyasi Şurasının təcili toplantısı keçirilib. Sonxeber.az-ın məlumatına görə, toplantının təcili keçirilməsinə səbəb, 2020-ci ilin aprel ayında Azərbaycanda növbədənkənar parlament seçkiləri keçiriləcəyi ilə bağlı müzakirələrdir. YAP-ın Siyasi Şurasında növbədənkənar seçkilərin keçirilməsi ilə bağlı qərar qəbul edilib.
Bu qərar sosial şəbəkələrdə geniş rezonansa səbəb olub. Əksər sosial şəbəkə istifadəçiləri bu qərarı Azərbaycanda uğurla aparılan islahatların davamı kimi qiymətləndiriblər. Məsələ ilə bağlı elə parlamentin millət vəkillərinin rəyini öyrəndik.
"Cənab prezentin rəhbərliyi altında dərin islahatlar aparılır".
Bunu Sonxeber.az-a açıqlamasında deputat Azər Badamov deyib.
Deputat vurğulayıb ki, bu islahatlar sosial-iqtisadi, idarəetmə, struktur, məhkəmə-hüquq və digər sahələri əhatə edib:
"Onu da qeyd etmək lazımdır ki, aparılan islahatlar öz müsbət nəticələrini verməkdədir. İdarəetmə sistemi gənc, təcrübəli və prezidentin islahatlarına adekvat cavab verə bilən şəxslərlə yenilənir. Bu proseslərdən ölkə parlamenti də kənarda qala bilməzdi. Növbədənkənar parlament seçkilərin həyata keçirilməsinin gündəmə gəlməsi də bu günün tələblərinə cavab verən, xalqın daha çox etimad göstərdiyi yeni təfəkkürlü insanların seçilməsinin vacibliyindən irəli gəlmişdir. Ölkə parlamenti də öz seçicilərinin etimadını doğrultmaqla ölkədə gedən inkişafa dəstək verməlidir. Düşünürəm ki, Parlament islahatların aparılması vacibdir və yeni seçiləcək parlament ölkə başçısının apardığı dövlət siyasətinin daha uğurla həyata keçirilməsinə töhfə verəcəkdir".
Sonxeber.az-a açıqlamasında "Atlas" Araşdırmalar Mərkəzinin rəhbəri Elxan Şahinoğlu bildirib ki, əslində bu gün cəmiyyət parlamentdən narazı idi.
Elxan Şahinoğlu qeyd edib ki, deputatların işləri qənaətbəxş deyildi:
"Mən özüm bu işlərlə məşğul olsam da cəmi 25 deputatı üzdən tanıya bilirdim. Çoxluq passiv idi. Demək olar ki, fəaliyyət göstərmirdilər. Ona görə də ölkə başçımız da ehtiyac duydu ki, parlamentin tərkibini dəyişsin. Ümid edirəm ki, yeni parlament keyfiyyətcə indiki milli məclisdən fərqli olacaq. Düşünürəm ki, seçkilərdən sonra mövcud parlamentin 60-70 faizi dəyişəcək".
Sonxeber.az-a açıqlamasında deputat Nəsib Məhəməliyev bildirib ki, son dövrlərdə Azərbaycan Prezidenti cənab İlham Əliyevin rəhbərliyi ilə aparılan islahatlar hakimiyyətin digər qollarında olduğu kimi, qanunverici orqan olan parlamentdə də islahatların aparılmasını zəruri edirdi.
Deputat qeyd edib ki, Bakı Dövlət Universitetinin 100 illik yubileyi ilə bağlı keçirilən tədbirdə Prezident, dövlətin və xalqın qarşısında duran problemlərdən, müasir qlobal çağırışlardan, islahatların daha da genişləndirilməsi, ideoloji işin yeni formatda aparılmasının zərurəti barədə proqram xarakterli çıxış etdi: "Təbii ki, bu tapşırıqların icrasını təmin etmək üçün müasir tələblərə cavab verən gənc nəslin dövlət idarəetmə sisteminə, qanunvericilik proseslərinə cəlb olunması zamanın tələbidir. Etiraf etmək lazımdır ki, son dövrlər Milli Məclisin ayrı ayrı üzvləri , bəzi hallarda bütövlükdə parlament müəyyən tənqidlərə məruz qalırdılar. Bu baxımdan demək olar ki, aparılan parlament islahatları eyni zamanda cəmiyyətin sosial sifarişidir. Vətənimiz üçün uğurlu olsun".
Aysel Yusifqızı
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş