"Azğın" romanının müəllifi Cəlil Cavanşir deyil-YENİ QALMAQAL

Cəlil Cavanşirin "Azğın" adlı yeni kitabı işıq üzü görüb.

Yazıçının 2015-ci ilin noyabrnda yazmağa başlayıb və bu ilin noyabr ayında tamamladığı romanı ərsəyə gələnə qədər bir çox çətinlik görüb. İş prosesində 3-4 dəfə adının dəyişməsi, müxtəlif nəşriyyatlardan çap üçün təklif gəlsə də, sonradan kitabdakı açıq-saçıq səhnələrə görə kitabın çapından imtina edilməsi yazarı ruhdan salmayıb. Nəhayət , kitab "XAN" Nəşriyyatında çap olunub. Lakin, ötən gün nəşriyyatın naşiri Müşfiq Xanın öz Facebook sosial hesabında paylaşdığı post böyük səs-küyə səbəb oldu.

Sözügedən postu olduğu kimi təqdim edirik:

"Açıqlama...
On ildən çoxdur nəşriyyatda işləyirəm. Və səkkiz ili ötüb, Cəlil Cavanşirlə dostuq. Bu açıqlamanı ortaq dostlarımızın təkidi ilə ictimailəşdirirəm. Əminəm ki, əziz dostum məni anlayacaq. Elə buna görə də bu açıqlamanı rahat paylaşıram. Məsələ burasındadır ki, son iki gündə sözügedən "Azğın" romanının müəllifi Cəlil Cavanşir deyil. Heç ümumiyyətlə romanın ilkin adı "Azğın" da deyilmiş. Təəssüflə bildirmək istəyirəm ki, müəllif bu sirri bizə - mənə və eyni məclisdə iştirak edən daha üç dostumuza (oxu: şahidə) dünən axşam, yəni kitab artıq işıq üzü görəndən sonra açıb. Dediyim kimi, on illik təcrübəmdə başıma ilk dəfə belə iş gəlir. Belə olmamalıydı, heç olmamalıydı... Heyif..."
Məsələ ilə bağlı Sonxeber.az-a açıqlama verən Cəlil Cavanşir romanın naşirinin bu barədə yazmaqla öz peşəkar imicini zərbə altına qoyduğunu bildirib:
"Bəli, Müşfiq bəyin iki iddiasından biri haqlıdır. Romanın adı ilk versiyada "Dəli Qorqud", ikinci versiyada "Bir dəlinin əhvalatları", üçüncü versiyada "Aşiqlər və başqa dəlilər" idi. Bu barədə Müşfiq Xanla ətraflı söhbət etmişdik. Romanın annotasiyasında da qeyd etmişəm, "Azğın psixoloji xəstəlikdən və sevgisizlikdən əziyyət çəkən, uşaqlıq travmaları bütün həyatını alt-üst edən bir dəlinin romanıdır." Postmodern epoxada müəllif önəmli deyil, mətn önəmlidir. Düşünürəm ki, "Azğın" son 20 ildə yazılmış romanların içində öz xüsusiliyinə görə seçiləcək. Qaldı ki, əziz dostum Müşfiq Xanın iddialarına, yaxşı olardı ki, bütün iddialarını sübut etsin. İnanmıram ki, o bu iddiaları sübut edə bilsin".
Bəli, iddialarını sübut etməsi üçün Müşfiq Xanla əlaqə saxladıq. Lakin, o:

"Onunla bağlı hər hansı bir məlumat verməyəcəyəm.Açıqlama yazılıb. Mən hazırda tədbirdəyəm"-deyə bildiridi.

Xatırladaq ki, "XAN" Nəşriyyatında çap olunan kitabın təqdimatı 14 dekabr tarixində baş tutacaq.

Lamiyə Məmmədova

Telegramda izləyin

instagramda izləyin