Psixoloqdan SƏRT AÇIQLAMA: "Toyda tort yemək üstündə gəlini döyən bəylərə yazığım gəlir"
Son günlərin ən aktual problemlərindən biri sosial şəbəkələrdə azərbaycanlı bəylərin gəlini döyməsidir. Bu döyülmə halları toyda qondarma adət- ənənəmiz kimi təqdim olunan "tort yemək" üstüdə baş verir. Bəy gəlinin, gəlin də bəyin ağzına tort parçası uzadaraq bir- birlərinə şirinlik edirlər. Gəlinlər bu zaman adətən dəcəl qız obrazı yaradaraq tort parçasını gah irəli, gah geri uzadaraq gələcək həyat yoldaşları ilə zarafat edirlər. Elə bu məqamda dəhşətli görüntülər ortaya çıxır. Hirslənən bəy gəlini elə toyun ortasındaca şilləyə "qonaq" edir. Maraqlıdır, indiki bəylər niyə belə aqressiv davranır?
Bununla bağlı Sonxeber.az-a danışan psixoloq Vəfa Əkbər belə bəylərin aqressiv olmalarını onların utancaqlıq hissləri ilə əlaqələndirir:
"Çox rahat, intellekt və yumor hissinə malik olan bəylər var ki, bu zarafatı çox gözəl qarşılayırlar. Bu zarafatı o insanlar qəbul etmirlər ki, onlar cəmiyyət içində özlərini rahat hiss etməyən insanlardır. Belə insanlar kompleksli, utancaq, çəkingən, özlərində qüsur bilən insanlardır. Ətrafda kimsə onunla zarafat etməyə çalışanda həmin şəxs onu zarafat kimi deyil, ələ salmaq kimi anlayır və avtomatik olaraq aqressiv şəkildə reaksiya göstərirlər. Bu, normal reaksiya deyil".
Vəfa Əkbər qeyd edib ki, yoldaşını döyən bəy birinci olaraq xanımını alçaldır. Psixoloq bildirib ki, həmin bəylər bununla "sən məndən aşağısan, hələ sən məni ələ də salırsan?" demək istəyir. Ona görə də belə şəxslərin qarşısında durmaq çox çətin olur. Problem insanın tərbiyə aldığı ocaqdadır. Ailə ona doğru tərbiyə və özünü doğru ifadə etmək şəklini öyrədə bilsəydi, həmin bəy ən azı toyunda xanımını pərt etməzdi.
Psixoloq həmçinin bildirib ki, ailə quran şəxslər həyat yoldaşının nə demək olduğunu heç başa düşmür:
"Onlar əzginlik kompleksindən əziyyət çəkən, kompleksli adamlardır. Onlar dərk etmədən ailə həyatı qururlar. Əgər həmin yola qədər doğru gəlməyiblərsə, deməli həyat yoldaşlarını da özləri seçməyiblər. Belə şəxslər "Mənim də arvadım olacaq" təfəkkürü ilə sadəcə sosial statusu tamamlamaq üçün ailə quranlardır. Qarşısındakının qəlbinə əzənlər heç nəyin fərqində deyillər və özləri tamamlanmayıblar. Onların intellektual yumoru aşağı olan insanlardır. Mən elə insanlara baxanda yazığım gəlir".
Psixoloq azərbaycanlılarda daha çox belə hallarla qarşılanma sualına isə belə cavab verib:
"Kifayət qədər yumor hissi olan azərbaycanlı kişisi göstərə bilərəm. Xaricdə ana- ata özünə intim partnyor, qulluqçu axtarmır. Oğluna da sadəcə yanında gəzəcək gəlincik axtarmır. Bu yenə də keçmiş nəslin problemi kimi gündəmə gəlir".
Şəlalə Babayeva
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş