"Bəzi sürücülərimizə normal yol yaraşmır"-Ekspert yol qəzalarından DANIŞDI

Bu ilin 11 ayı ərzində Bakı şəhərində qeydə alınan yol-nəqliyyat hadisələrinin təhlili zamanı piyadaların avtomobillərlə vurulması hallarının çoxluğu Daxili İşlər Nazirliyinin (DİN) və Bakı Şəhər Dövlət Yol Polisi İdarəsinin (BŞDYPİ) rəhbərliyini ciddi narahat edir.
Bildirilir ki, cari ilin 11 ayı ərzində Bakı şəhəri ərazisində 488 yol yol-nəqliyyat hadisəsi baş verib: "Baş verən yol-nəqliyyat hadisələri zamanı 167 nəfər ölüb, 438 nəfər isə xəsarət alıb.
Bununla bağlı Sonxeber.az-a danışan Yol-nəqliyyat məsələləri üzrə ekspert Elməddin Muradlı son illər piyadaların vurulması ilə nəticələnən hadisələrin sayının artdığını deyib. O, yollarda qəza hadisələrini nyaranmasında iştirak edən üç məqama diqqət çəkib:
"Buarda üç məqama diqqət çəkmək istəyirəm. Bunlardan piyada məsuliyyətsizliyi, sürücü diqqətsizliyi və yol təsərrüfatının normal vəziyyətdə olmamasını deyə bilərik. Yol təsərrüfatının normal vəziyyətdə olmamasına yolların işıqlandırılmaması, piyada zolaqlarının olmaması, piyadaların normal hərəkətini təşkil etmək üçün səkilərin olmamasını göstərə bilərik. Deyək, ki, yola piyada zolağı çəkirlər. Baxırsınız ki, iki və ya üç aydan sonra bu işarə silinir, piyada haradan keçəcəyini görmür. Belə halla qarşılaşan sürücü də piyada kimi bu zolaqları görmədiyi üçün piyadanı elə həmin zolağın üzərində vurur".
Elməddin Muradlı piyada keçidləri arasındakı məsafələrin qanunda qeyd olunduğu kimi olmadığını bildirib: "Qanunda maksimum yaşayış məntəqələrindən kənarda 700 metrdən bir piyada keçidinin olması nəzərdə tutulur. Bəzən isə elə yollar var ki, kilometrlərlə getsən də qarşına piyada keçidi çıxmır. Bunun nəticəsində də hər gün yollarda qəzalar, xəsarətlər, ölümlər baş verir. Piyada keçidinin 10- 15 metrliyindən keçən piyadalara rast gəlinir".
Ekspert həmçinin sürücü məsuliyyətindən də danışaraq, onların da qəza şəraiti yaratdığını deyib:
"Digər tərəfdən sürücülərin məsuliyyətsizliyi də özünü göstərməkdədir. Bakı- Quba- Rusiya yolu əvvələr çox bərbad gündə idi. Oradakı yolda çala- çökək əmələ gəlmişdir. Azəravtoyol tərəfindən orda kosmetik dəyişiklik edildi, həmin çala- çökək düzəldildi. Belə deyək də, yol normal vəziyyətə gətirildi. Düzələn kimi həmin yolda hadisələrin sayı artdı. Bu o deməkdir ki, bizim bəzi sürücülərimizə normal yol yaraşmır. Yol normal olanda sürücülər gözlərini yumub, qazı basırlar və ağır qəzalar törədirlər. Normal yollarda bizim bəzi sürücülər özlərini apara bilmirlər".
Qeyd edək ki, Daxili İşlər Nazirliyinin Baş Dövlət Yol Polisi İdarəsi bütün hərəkət iştirakçılarını, xüsusilə də piyadaları həftəlik ərzində nümunəvi davranışla çıxış etməyə çağırır.

Şəlalə Babayeva

Telegramda izləyin

instagramda izləyin