"Türkiyə rəsmi səviyyədə Amerikanın hərbi bazalarını bağlamaq haqqında düşünür"-RƏY
ABŞ Senatının Beynəlxalq Əlaqələr Komitəsi Türkiyəyə qarşı sanksiya tətbiqini özündə əks etdirən qanun layihəsini qəbul edib.
Qanun layihəsi Türkiyənin Suriyada həyata keçirdiyi hərbi əməliyyatlara və Rusiyadan aldığı "S-400" hava hücumundan müdafiə komplekslərinə görə sanksiyalar nəzərdə tutur.
Bu qərar Türkiyədə sərt etiraz doğurub. Bir gün əvvəl Türkiyənin Xarici İşlər naziri Mövlud Çavuşoğlu deyib ki, əgər ABŞ Türkiyəyə sanksiya tətbiq etsə, o zaman İncirlik və Kürəcik bazaları məsələsi gündəmə gələ bilər. Çavuşoğlu bununla yanaşı bildirib ki, Türkiyə ABŞ-ın təyyarələrin çatdırılmasından imtina edəcəyi halda rus qırıcılarına F-35-lərin alternativi kimi baxır.
Mövzu ilə bağlı Sonxeber.az-a politoloq Elxan Şahinoğlu açıqlama verib. O, bildirib ki, Türkiyə öz milli və təhlükəsiz maraqları ilə çıxış edir.
"Əslində Türkiyə, Amerika ilə münasibətlərin gərginləşməsinin tərəfdarı deyil. Soyuq müharibə illərində strateji müttəfiq idilər, çünki qarşılarında SSRİ-i kimi təhlükəli dövlət var idi. Amma soyuq müharibə bitdi, SSRİ-i dağıldı, Türkiyə bölgədə əsas rol oynamağa başladı. Türkiyə öz təhlükəsizliyini düşünməli, sərhədlərini qorumalıdır. Çünki terrorla mübarizə aparır. Türkiyə Amerikadan "Patriot" raketlərini almaq istəyirdi amma satmadılar və Türkiyə məcbur qalıb Rusiyadan "S-400" aldı. Amerika indi Türkiyəyə qarşı sanksiya tətbiq edir. Müstəqil dövlətin siyasətinə qarşı çıxmaq doğru yanaşma deyil. İndi də Türkiyəyə F-35 hərbi təyyarələrini satmaq istəmir. Halbuki pulun bir hissəsi ödənilib anlaşma da var. Hətta təyyarələrin bir hissəsi Türkiyədə istehsal olunub, buna rəğmən ABŞ qırıcıları satmaq istəmir.
Bunun qarşılığında da, Amerikada anti-türk qüvvələrin sayı çoxalır. Donald Tramp Türkiyə ilə yaxın əməkdaşlığın tərəfdarıdır, Ərdoğan ilə Vaşinqtonda da görüşdü. Amma bütün məsələləri Ağ Ev sahibi həll etmir. Kongresdə anti -türk, anti-Azərbaycan əhval-ruhiyyə var və ard-arda Türkiyə əleyhinə müxtəlif sanksiyalar tətbiq edilir. Bu sanksiyalar Türkiyə-Amerika münasibətlərinə çox zərər vurur, Trampın işini daha çox ağırlaşdırır. Türkiyə daha çox Amerikadan uzaqlaşır və nəticədə də Türkiyənin Xarici İşlər naziri Mövlud Çavuşoğlu deyir ki, bele getsə biz Amerikanın Türkiyədəki hərbi bazasını bağlaya bilərik. Düzdür, bu riskli addımdır, Türkiyə bu addımı asanlıqla ata bilməz. Amma bu Amerikaya bir mesajdır. Görün münasibətlər nə vəziyyətdədir ki, Türkiyə rəsmi səviyyədə Amerikanın hərbi bazalarını bağlamaq haqqında düşünür.
Məsələnin Azərbaycanla bağlığından danışsaq deyə bilərəm ki, Ermənistanı çıxmaq şərti ilə Azərbaycanın bütün dövlətlərlə normal münasibətləri var. Azərbaycan ilə Amerika arasında münasibətlər yaxşıdır. Donald Tramp bir neçə dəfə Azərbaycan prezidentinə məktub göndərib. Hansı ki Türkiyə ilə münasibətləri gərgin olan Amerika, İsrail, Misir ilə də yaxşı münasibətlərimiz var. Çünki bu məsələdə bizim fərqli mövqeyimiz var. Amma hər halda Türkiyə-Amerika münasibətlərinin gərginləşməsi bizə də müəyyən problemlər yarada bilər. Bəzi qüvvələr qarşısında seçim etməyə məcbur qala bilərik amma biz seçim etməyəcəyik. Türkiyə bizim qardaş dövlət, strateji müttəfiqimizdir. Amerika ilə də normal münasibətlər var və bu münasibətlər davam edir. Məsələ burasındadır ki, Amerikada ermənilərin, erməni lobbisinin istəyi ilə erməni soyqırımı qətnaməsi tanınır, Türkiyə əleyhinə sanksiyalar tətbiq olunur. Əlbəttə ki, biz bunu xoş qarşılaya bilmərik".
Fəridə Ağazadə
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş