"Təyyarənin vurulması İran hərbi qüvvələri arasında koordinasiyalı bir fəaliyyətin olmadığını açıq şəkildə göstərdi"-RƏY
Məlum olduğu kimi, bu günlərdə İran İraq ərazisində ABŞ hərbçilərinin yerləşdiyi bazaya ballistik raket atdıqdan bir neçə saat sonra Ukraynaya məxsus sərnişin təyyarəsini bilmədən vurulduğunu açıqlayıb.
Bu gün səhər saatlarında isə İran Silahlı Qüvvələri Baş Qərargahı Ukrayna Beynəlxalq Hava Yollarına məxsus təyyarənin "insan səhvinə görə" vurulduğunu bildirib.
Mövzu ilə bağlı Sonxeber.az-a politoloq Məhəmməd Əsədullazadə açıqlama verib. O, bildirib ki, ABŞ ilə İran arasında Yaxın Şərqdə hərbi ,siyasi və iqtisadi konfrontasiya hazırda çox ciddi problemlərə gətirib çıxarmaqdadır. Amerikanın Bağdadda İranın Qüds Qüvvələri komandanı Qasım Süleymaninin öldürülməsindən bir neçə gün sonra Tehran hava limanından qalxan, Ukraynaya məxsus "Boeing-737" sərnişin təyyarəsinin qəzaya uğraması müəyyən fikirlərin yaranmasına səbəb oldu. İran çalışırdı ki, belə bir təyyarənin vurulmasını pərdəarxası konfidensial olaraq Amerikanın üzərinə yıxsın ki, guya Amerika bu təyyarəni raket atəşi ilə vurub. Amma ilk açıqlamalar da ABŞ və Kanadadan gəldi. Onlar bu cür sərnişin təyyarəsinin İran tərəfindən qəsdən ehtimal ediləcək dərəcədə vurulduğunu qeyd etsələr də, faktla bunu sübut edə bilmədilər. Təbii ki, artıq İran rəsmi şəkildə etiraf edi ki, "Boeing" sərnişin təyyarəsi SEPAH-ın ərazisindən keçən vaxt SEPAH tərəfindən vurulub. Əlbəttə, bu təyyarənin vurulması bir neçə məqamı göstərir. Belə ki, bu hadisə SEPAH-ın müstəqil şəkildə Ali Baş Komandan və digər ordu birləşmələri ilə əlaqə qurmadan mülki təyyarəni vurub yerə salması, İran hərbi qüvvələri arasında koordinasiyalı bir fəaliyyətin olmadığını açıq şəkildə göstərdi. Bu da o deməkdir ki, İran Amerika ilə müharibəyə hazır deyil. Bu da, İran hərbi hava qüvvələrinin qeyri-peşəkarlığını yəni, mülki təyyarəni hərbi təyyarədən ayırmaq üçün bir texnologiyasının olmadığının və İranın Silahlı Qüvvələrinin ciddi şəkildə texniki imkanlardan zəif olduğu anlamına gəlir. Amma həmişə rəsmi Tehran öz müasir texnologiyaya malik ordusu ilə qürrələnirdi. Amma məlum olur ki, İran ordusu heç də müasir texnoloji parametrlərə cavab vermir. Həmçinin İranın Ukranyaya məxsus sərnişin təyyarəsini vurması hesab edirəm ki, qəsdən ola da bilər, yəni, hər bir variant mümkündür. Çünki Tehran rejimi qapalı bir rejimdir. Regionda, Yaxın Şərqdə ciddi şəkildə öz siyasi, hərbi məqsədlərini həyata keçirmək üçün bütün mənfi yəni, humanitar fəlakətlərə, hərbi cinayətlərə yol açan parametrlərdən istifadə edir. Təyyarənin vurulması məhz Amerikaya bir mesaj da ola bilər ki, yəni sizin sərnişin təyyarəniz də hədəfimiz ola bilər. Təbii ki, bu versiyadır. Amma göründüyü kimi bir sərnişin təyyarəsinin SEPAH tərəfindən Tehran yaxınlığında vurulması göstərir ki, rəsmi Tehranın hakimiyyət elitasında ciddi şəkildə haçalanmalar var. Tərəflər bir-birinə tabe olmur və dövlət içində ayrı-ayrı paralel dövlətlərə malikdirlər. Belə olan halda, İranın Amerika kimi qlobal güc ilə müharibə etməsi təbii ki, gülünc görünə bilər. Baxmayaraq ki, İraqda və Suriyada vəkalət müharibəsi aparırlar. Amma bu təyyarə hadisəsi göstərdi ki, İran heç də Amerika ilə müharibə aparacaq şəkildə güclü bir ölkə deyil. Qeyd etdiyim kimi adi bir sərnişin təyyarəsini Tehran yaxınlığında ayırd edə bilmədən, səhvən vurulduğunu etiraf edən İran heç vaxt müharibə etmək iqtidarında olan ölkə deyil.
Fəridə Ağazadə
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş