"Sən o yeməkdən mənə verməyəcəksən, hə?"- Yemək davası edən aktyor- FOTOLAR

"Mənfi obrazı oynamağı sevirəm. Mən aktyoram. Bu mənim işimdir. Həyatda elə bir insan deyiləm".

Bunu Sonxeber.az-a Atv telekanalında yayımlanan "Bir qadın" serialından tanıdığımız, Aydın rolunu canlandıran Azərbaycan Dövlət Akademik Milli Dram Teatrının aktyoru Cümşüd Zeynalov bildirib. Avara həyat tərzi sürən, həm də evdə ancaq yemək davası edən rolu ilə tamaşaçıların rəğbətini qazanan aktyor serialda izlənən xüsusi personajdır:

""Bir qadın" serialı "Oskar Production" ın layihəsi idi. Serial həmin şirkətin istehsalıdır. Mən bu serialdan əvvəl "Uçurum" serialında oynamışam. Mövsüm finalı bitdi və məni həmin şirkətin baş prodüsseri Yaşar Əhmədov "Bir qadın" serialında Aydın obrazını canlandırmağa dəvət etdi. Məni dəvət edib rol haqqında məlumat verdilər və rol mənim çox xoşuma gəldi".

Aktyor obrazı xarakterik və gülməli nüansları olduğu üçün bəyəndiyini açıqlayıb. Real həyatda isə obrazdakı kimi qarınqulu olmadığını, həmçinin ailəsinə düşkün olduğunu bildirib. Həmçinin oynadığı rola görə əks cinsin gülüş hədəfində olmağından narahat olmadığını da açıqlayıb:

"Həmin işdə quruluşçu- rejissor Şahin Qəhrəman və rejissor Zaur Hüseynin rolu var. Ümumiyyətlə mən mənfi obrazları oynamağı daha çox sevirəm. Oynadığım rollarda çox zaman mənfi rolda çıxış etmişəm.
Mənfi və xarakterik obrazları oynamağı sevirəm. Həmin mənfiliyi göstərərək elə insanların olduğunu göstərməyə çalışıram. Həyatda o cür insanlar var. Məsələn, Aydın obrazını götürək, onun həyatda prinsipi nədir? Aydın üçün yemək olsun, işləmək olmasın. Yesin, yatsın. Nə uşaq qədri, nə ailə qədri bilir. Belə düşüncələr məni qətiyyən narahat etmir. Mən aktyoram. Bu mənim işimdir. O obrazdır, mən deyiləm. Həmin serialda mənim bir qızım var, amma həyatda iki qızım, bir oğlum var. Mənim aktyor dostlarım da bilir ki, mən həyatda ümumiyyətlə çox ailəcanlı insanam. Mən həqiqətən də ailəmi çox sevirəm, uşaqlarım üçün yaşayıram. Şablon səslənə bilər, amma həqiqətən də belədir".

Şəlalə Babayeva

Telegramda izləyin

instagramda izləyin