"Azərbaycanda yeni özəlləşdirmə proqramı hazırlanmalı, dövlət müəssisələri özəlləşdirilməlidir"-RƏY

Ötən ilin yekunlarına dair dünən keçirilən mətbuat konfransında İqtisadiyyat naziri Mikayıl Cabbarov nazirlikdə Azərbaycanda gedən prosesləri nəzərə alaraq, yeni özəlləşdirmə proqramının hazırlamağa başlandığını bildirib.
İnkişafın indiki mərhələsində özəlləşdirmənin hansı formasının Azərbaycan üçün də məqbul olacağı gözlənilir?

Mövzu ilə bağlı SONXEBER.AZ-a iqtisadçı-ekspert Akif Nəsirli açıqlama verib. O, bildirib ki, özəlləşdirmə Azərbaycanda vacib olan amillərdən biridir:
"Elan edirik ki, biz bazar iqtisadiyyatında keçid dövrünü keçmişik. Amma məsələ burasındadır ki, biz bazar iqtisadiyyatına keçidi tam başa vurmamışıq. Bu gün Azərbaycanda xidmət sektorunun 80-90%-i dövlətə məxsusdur. Məsələn "Azərsu","Azərişıq", "Azərqaz" və sairə bu cür kifayət qədər müəssisələrimiz var. O, müəssisələri normal bazar iqtisadiyyatına oturuşması üçün həmin xidmət müəssisələrinin hamısı özəlləşdirilməlidir. Özəlləşdirməyə çıxarılması məsləhət olmayan çox az xidmət növləri var ki, bunlar təcilli yardım ,yanğınsöndürmə xidmətidir. Qeyd edim ki, hətta dünya təcrübəsində bunların da müəyyən şərtlər altında özəlləşdirilməsi təcrübəsi var. Bu gün bir çox şirkət özəlləşdirilməlidir. Bu səbəbdən də mən Mikayıl Cabbarovun fikrini məqbul hesab edirəm. Azərbaycanda yeni özəlləşdirmə proqramı hazırlanmalı, dövlət müəssisələri özəlləşdirilməlidir. Özəlləşdirmə zamanı da monopoliya məsələsi diqqət mərkəzində olmalıdır. Özəlləşdirmə proqramı elə seçilməlidir ki, bazarda rəqabət mühiti formalaşsın. Hazırki dövrdə ölkə iqtisadiyyatında inhisarçılıq var ki, onların bir hissəsi özəl sektora, digər hissəsi müxtəlif məmurlara məxsusdur. İnhisarçılıq da bazar iqtisadiyyatının ən böyük düşmənidir. Bazar iqtisadiyyatının özəyini də rəqabət təşkil edir. Ona görə də rəqabəti formalaşdırmaq üçün həm özəl sektordakı inhisarçılığı, həm də dövlət inhisarçılığı aradan qaldırılmalıdır. Bundan sonra da Azərbaycan iqtisadiyyatının inkişaf imkanları daha da genişlənəcəkdir".

Fəridə Ağazadə