Professor SOCAR-a "yaxşı" qiymətini verdi

"SOCAR-ın 2019-cu il üzrə fəaliyyəti uğurludur"

Ötən gün Azərbaycan Dövlət Neft Şirkəti (SOCAR) 2019-cu il üzrə göstəricilərini açıqlayıb.

Hesabata görə, 2019-cu ildə SOCAR birbaşa öz imkanları ilə istismar etdiyi yataqlardan 7,7 mln. ton neft, 6,8 mlrd. kubmetr qaz hasil edib. Şirkətin qaz hasilatı 2018-ci ildən 4,5%, neft hasilatı isə 1,8% artıq olub.

Hesabata əsasən, 2019-cu ildə Azərbaycanda təbii qazın ümumi daxili istehlakı 918 milyon kubmetr və ya 8,7% artaraq 11,5 mlrd. kubmetr təşkil edib. Ölkədə təbii qaz infrastrukturunun genişlənməsi nəticəsində əhali arasında qaz istehlakının səviyyəsi də təxminən 8,5% artıb. 2019-cu ildə SOCAR təqribən 2,2 mln. ton neft emalı və neft-kimya məhsulları ixrac edib ki, bu da əvvəlki illə müqayisədə təqribən 22% artım deməkdir.
Bildirilib ki, neft və qaz-kimya ixracının artması SOCAR-ın yeni Karbamid zavodu və "SOCAR-Polymer" kompleksinin fəaliyyəti, eləcə də SOCAR-ın Metanol zavodunda istehsalat səviyyəsinin yüksəlməsi ilə bağlıdır.

Eldar Süleymanov:
"SOCAR-ın 2019-cu il üçün fəaliyyətini müsbət qiymətləndirirəm".

Bəs ekspertlər SOCAR-ın bu istiqamətdəki fəaliyyətini necə qiymətləndirir?

Azərbaycan Dövlət Neft və Sənaye Universitetinin Qaz-Neft Mədən fakültəsinin professoru Eldar Süleymanov SOCAR-ın 2019-cu il üztə fəaliyyətinin uğurlu olduğunu bildirib.

"SOCAR-ın 2019-cu il üçün fəaliyyətini müsbət qiymətləndirirəm.Neft-qaz hasilatında artım varsa, deməli qazma həyata keçirilir, hasilat da normal templə artır. Bu artım faizləri yaxşı göstəricilərdir. SOCAR-ın faiz göstəriciləri çox normal artım faizləridir. Bu, həm də o deməkdir ki, işlər plan üzrə gedir".

E. Süleymanovun fikrincə, işlərin planlaşdırılmış şəkildə aparılması göstərir ki, yeni quyuların qazılması, onların istismara verilməsi, neftin və qazın nəqli, həmçinin digər proseslər layihə üzrə davam etdirilir: "Bunlar müsbət göstəricilərdir".

Professor bildirib ki, neft emalı və neft-kimya məhsullarının ixracının 22 faiz artması isə SOCAR-ın yeni bazarlara çıxmasının göstəricisidir. "Şirkətin neft-kimya məhsullarının ixracında 22 faiz artıma nail olması kiçik göstərici deyil. Bu, çox böyük rəqəmdir. Əgər bu sahədə bu həcmdə, artım varsa, deməli SOCAR yeni xarici bazarlara çıxıb, istehsal etdiyi məhsulların satışı üçün yeni imkanlar yaradıb".

Telegramda izləyin

instagramda izləyin