"Dünyanın aparıcı banklarından biri Azərbaycan dövlətinə, iqtisadiyyatına etibar edir"-ŞƏRH
Prezident İlham Əliyev Davosda bir sıra xarici ölkələrin nümayəndələri və şirkət rəhbərləri ilə işgüzar görüşlərini davam etdirib.
Avropa Yenidənqurma və İnkişaf Bankının prezidenti Suma Çakrabarti ilə görüş - ölkəmizin bu beynəlxalq təşkilatla qarşılıqlı əlaqələrinin məhsuldarlığını təsvir etmək imkanı yaradır.
Mövzu ilə bağlı Sonxeber.az-a iqtisadçı-ekspert Akif Nəsirli açıqlama verib. O, bildirib ki, Dünya İqtisadi Forumu hər il bir dəfə keçirilir:
"Burada dünya ölkələrinin bir il ərzində qarşıya qoyduğu məqsədlər, planlar barədə ümumi müzakirə olur. Bu baxımdan bütün dünya üçün bu əhəmiyyətli bir forumdur. Azərbaycan hökumətinin və Azərbaycan dövlət başçısın bu foruma dəvət alması təqdirəlayiq haldır. Azərbaycanın bu foruma dəvət alması belə böyük nailiyyətdir. Avropa Yenidənqurma və İnkişaf Bankı dünyada iqtisadi baxımdan irəliləyişi olan və etibarlı ölkələr ilə daha çox tərəfdaşlıq edir. Hazırda Azərbaycan həmin bankdan xeyli kredit götürüb və kreditin maliyələşməsi normal qaydada gedir. Amma məsələ burasındadır ki, həmin bankın Azərbaycan iqtisadiyyatına tələbləri daha yüksəkdir. Bu tələblərin hamısını yerinə yetirə bilməmişik. Yəni həmin bankın elit ölkələri sırasına hələki daxil deyilik. Çünki bizim iqtisadiyyatın problemləri hələ onların tələblərinə uyğun olaraq tam həll olunmayıb. Azərbaycan prezidentinin bu forumda həmin bankın rəhbərliyi ilə görüşməsi o deməkdir ki, onlar ümid edirlər ki, Azərbaycan bu problemləri həll edəcəkdir. Qarşıdakı dövr ərzində bu problemlərin hamısı olmasa da bir hissəsi öz həllini tapacaq. Bu görüşün mesajı mən hesab edirəm ki, bundan ibarətdir. Bu da təqdirəlayiq haldır ki, dünyanın aparıcı banklarından biri Azərbaycan dövlətinə, iqtisadiyyatına etibar edir və onun daha da inkişaf edəcəyinə ümidlə yanaşır.
Fəridə Ağazadə
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş