"Breksitlə Avropa xaosa doğru addım atdı"-RƏY

Böyük Britaniya kraliçası II Elizabet "Brexit" sazişini təsdiqləyib. Həmçinin Avropa Parlamentinin konstitusiya işləri üzrə komitəsi fövqəladə iclasda Böyük Britaniyanın Avropa İttifaqının tərkibindən çıxmağı haqqında razılaşmanı təsdiqləyib. Avropa Parlamentinin yanvarın 29-da plenar sessiyasında səsvermədən sonra proses yekunlaşacaq. Bundan əvvəl isə İngiltərə parlamentinin İcmalar Palatası və Lordlar Palatası da bu sazişi təsdiqləyib.
Bununla da yanvarın 31-də Britaniyanın Avropa İttifaqını tərk etməsi üçün bütün əngəllər aradan qalxıb. Baş nazir Conson isə bildirib ki, ölkəsi gələn həftə Aİ-ni tərk edəcək.

Mövzu ilə bağlı politoloq Mübariz Əhmədoğlu Sonxeber.az-a danışıb. O, bildirib ki, Avropa xaosa doğru ciddi bir addım atdı:
"Əlbəttə Avropanın bu addımının səbəbi Böyük Britaniyadır. Yəni Böyük Britaniya Avropa İttifaqından çıxmaqla həm özünü, həm də Avropa İttifaqını yalnız problemlər istiqamətinə sürüklədi. Başlanğıcda hər iki tərəfdə müəyyən iqtisadi çətinliklər olacaq. İqtisadi geriləməni həm Böyük Britaniya, həm də Avropa İttifaqı aradan qaldıra biləcək. Bu iqtisadi qeyri-müəyyənlik 4-5 ildən artıq davam etməyəcək. Amma daha böyük problem iki istiqamətdədir. Birincisi, Avropanın ümumi təhlükəsizliyi konteksindədir. Çünki hazırda ABŞ Avropa İttifaqının təhlükəsizliyinə lazımi qayğı göstərə bilmir. Yəni "Marşal" planı üzərində qurulan Avropa İttifaqı demək olar ki, yoxdur. Mümkündür ki, Tramp və Trampdan sonra gələn prezidentlər də Avropa məkanında yaranmış vəziyyətdən öz maraqları üçün istifadə etsinlər. Yəni Avropanı vahid olmağa qoymasınlar və belə olan halda mümkündür ki, Amerika Böyük Britaniyadan bütün Avropaya qarşı istifadə etsin. Təbii ki, bu halda Rusiyanın, Çinin xüsusilə Rusiyanın mövqeyi Avropada güclənə bilər. Ona görə də təhlükəsizlik sahəsində Avropanın özünün vahid güc mərkəzi olmaması, indiki dövrdə özünün çox ciddi zərərli təsirini göstərəcək. Avropa gözəl yerdir, gözəl məkandır amma bir şeyi unutmayaq ki, Avropa dünya müharibələrinin məkanıdır. Yəni bütün müharibələrinin əksəriyyəti məsələn, birinci, ikinci dünya müharibələri Avropadan qaynaqlanıb. Vahid təhlükəsizlik sistemi ilə bağlı belə geosiyasi manipulyasiyalar dünyanı çox çətin vəziyyətə sala bilər. İkinci istiqamət Avropanın özünün daxilində etnik münaqişələr, etnik mübahisələrin hətta qanlı toqquşmaya çevrilə bilməsidir. Hazırda Böyük Britaniya böyük imperiyadır. İrlandiya, Şotlandiya hər biri demək olar ki, bölünmüş vəziyyətdədir. Onların tərkib hissələrində Böyük Britaniyadan çıxmaqla bağlı məsələ indi də aktual olaraq qalır. Eyni zamanda Cəbəllütariq üzərində İspaniya ilə Böyük Britaniya arasında böyük bir müharibə başlaya bilər. İspaniya deyir ki, Cəbəllütariq mənimdir amma Böyük Britaniya isə mənim ərazimdir deyə iddia edir. Eləcə də vaxtı ilə Böyük Britaniya Argentinaya Folklend, Molven adaları üstündə ona görə qalib gələ bildi ki, arxasında bütün Avropa, ABŞ dayanmışdı. Argentina bu gün zəifdir amma sabah güclənib Folklend, Molven adalarını özünə qaytarmaq istəsə, Böyük Britaniya təkbaşına da olsa müharibəyə gedəcək. Amma istər-istəməz bu qitələr arası müharibəyə gətirib çıxara bilər. Ona görə mən elə başa düşürəm Breksitin Avropa İttifaqı tərəfindən təsdiqlənməsi yaxşı heç nə vəd vermir".

Fəridə Ağazadə

Telegramda izləyin

instagramda izləyin