"Azərbaycan balı baha olsa da, çox keyfiyyətlidir"- Ekspert rəyi

Yanvarın 25-26-da Bakıda VI Azərbaycan Beynəlxalq Arıçılıq Konfransı keçiriləcək.

Bu ilki konfransda Azərbaycan, Türkiyə, Qazaxıstan, Belarus, Rusiya, Ukrayna və başqa ölkələrdən peşəkar arıçılar, elm və iş adamları təlimlər keçəcək, master-klass proqramları təqdim edəcəklər.

Konfrans müddətində 20-dən çox firmanın yer alacağı sərgiyə Azərbaycan, Çin, Pakistan, Rusiya, Türkiyə və sair fərqli ölkələrdən olan istehsalçılar qatılacaq, hər biri öz məhsullarını bölgənin arıçısı ilə tanış edəcək.

Arıçılıq konfransının rəsmi hissəsi ilə yanaşı "bal yarışması", qala gecəsi, mükafatlandırma mərasimləri keçiriləcək.

Bəs Azərbaycan balı xüsusiyyətləri, növləri, yüksək ekoloji keyfiyyəti ilə digər ölkələrin balından necə fərqlənir?

Məsələ ilə bağlı Azərbaycan Arıçılar Assosiasiyasının Mətbuat Xidmətinin rəhbəri Elvin Bayramov Sonxeber.az-a açıqlama verib. O, bildirib ki, Azərbaycan balı dünya ölkələrinin balından öz qiymətinə görə fərqlənir:

"Bizim ölkənin balı bahalıdır. Eyni zamanda həm də çox keyfiyyətlidir. Çünki Azərbaycan günəşli ölkədir. Bu da məhsulun tərkibinə və dadına birbaşa təsir edir. Buna görə də Azərbaycan balının topdan satışı Avropa balının pərakəndə satışından bahadır. Həmçinin növlərinə görə də bizim ölkənin balı digər ölkələrdən fərqlənir. Belə ki, Azərbaycan balının növləri çoxdur. Buna misal olaraq qaratikan balını göstərə bilərik. Bu bitki demək olar ki , yalnız Azərbaycanda bitir. Bu bitkinin balı may ayının sonu iyun ayının əvvəlinə təsadüf edir. Olduqca dadlı bal olur. Bundan əlavə bian balı və dağ-çəmən balları da öz dadına görə fərqlənir.
Azərbaycanın fərqli iqlim tipləri var və həmin iqlimdə yerləşən meşə zolaqlarında yetişən çiçəklər və bitkilərdən çəkilən bal öz dadına, ətrinə, keyfiyyətinə görə bir-birindən fərqlənir.

Onu da qeyd edim ki, dünyanın bir çox ölkələrində zərərli həşəratlara qarşı pestisitlərdən istifadə olunur. Bu pestisidlər bitkilərin üzərinə yapışaraq çiçəklərin nektarına hopur və arıların keyfiyyətli məhsul istehsal etməsinə mane olur. Balın çirklənməsi baş verir. Bizim ölkədə bunlardan istifadə olunmadığına görə istehsal olunan bal ekoloji cəhətdən də olduqca keyfiyyətlidir.

Balın satış qiymətinə gəlincə onu deyə bilərəm ki, Bakı şəhərində bu məhsulun 1 kq-ın qiyməti 20-40 azn arasında dəyişir. Gələcəkdə arıçılıq çox inkişaf etsə, bu qiymət 17-35 azn arasında da dəyişə bilər".

Qeyd edək ki, 6 ildir ardıcıl keçirilən konfrans arıçılıq sahəsində Qafqazda keçirilən ən böyük konfransdır.

Lamiyə Məmmədova

Telegramda izləyin

instagramda izləyin