"İşğal olunmuş ərazilərdəki abidələrin bərpa işləri xaricdəki erməni diasporasının yardımları ilə həyata keçirilir"-RƏY

Ermənistan Xarici İşlər Nazirliyinin mətbuat xidməti bəyan edib ki, "Dağlıq Qarabağ heç vaxt Azərbaycanın bir hissəsi ola bilməz".

Ermənistan rəhbərliyi daha əvvəl də bu cür qızışdırıcı, provokativ bəyanatlar verməklə diqqəti Ermənistan daxilində baş verən proseslərdən yayındırmaq, ənənəvi diqqəti "xarici düşmənə yönəltmək" metoduna baş vurur.

Daha bir məlumat budur ki, separatçı rejim Şuşa qalasının restavrasiya ediləcəyini bildirib. Bu da dolayısı yolla da olsa Azərbaycanda narazılıq və qəzəb doğurmağa hesablanıb.

Belə olduğu halda ortaya belə bir sual çıxır: Erməni provokasiyasının gerçək səbəbləri nədir?

Mövzu ilə bağlı politoloq Nəzakət Məmmədova Sonxeber.az-a açıqlama verib. O, bildirib ki, Ermənistan öz işğal siyasətinə "sadiqdir" və özbaşınalığına qarşı beynəlxalq ictimaiyyət tərəfindən adekvat reaksiya görmədiyinə görə 30 ildir ki, bu cür davam edir:

"Silahlı münaqişələr dövründə mədəniyyət abidələrinin toxunulmazlığı, yaxud onlara zərər vurulması, dəyişdirilməsi yolverilməzdir. Bütün bu və ya digər beynəlxalq sənədlər mədəniyyət abidələrinin toxunulmazlığını qəbul edir. 1954-cü il Haaqa konvensiyası və digər sənədlər buna misaldır. Ermənistan bu işi təkbaşına və özbaşına etməyib. Məsələn, İranın Gövhər ağa məscidini mədəniyyət mərkəzi kimi istifadə etməsi beynəlxalq hüququn müvafiq müddəalarının pozulması deməkdir. İşğal olunmuş ərazilərdəki restavrasiya işləri xaricdəki erməni diasporasının yardımları ilə həyata keçirilir. Həmin şəxslər və restavrasiya işlərini həyata keçirən şirkətlər müəyyən edilməli, beynəlxalq hüquq qarşısında məsuliyyətə cəlb edilməlidir. Həmçinin Minsk qrupu da buna münasibət bildirməlidir" .

Lamiyə Məmmədova

Telegramda izləyin

instagramda izləyin