"Dünya bazarında qazın qiyməti qarşıdakı aylarda o qədər də ucuzlaşa bilməz"-RƏY

"Vygon Consulting"adlı rus şirkətinin məlumatlarına görə, 2020-ci il yazın sonu - yayın əvvəlində Avropada qaz qiymətləri ən aşağı səviyyəyə enəcək və yalnız payızın sonlarında artacaq. Həm anomal isti qış, həm də Ukrayna ərazisindən tranzit qaz tədarükünün dayandırılması təhlükəsi fonunda Avropa anbarlarında toplanan rekord qaz ehtiyatı buna gətirib çıxaracaq.
Avropa qaz anbarlarının təbii qazla dolmasının Azərbaycandan Avrozonaya mavi yanacağın ixrac tədarükünün qiymətlərinə təsir göstərə biləcəkmi?

Mövzu ilə bağlı iqtisadçı-ekspert Akif Nəsirli Sonxeber.az-a danışıb. O, bildirib ki, hazırda Azərbaycanın və Rusiyanın qaz ixrac etdiyi ərazilər tamamilə fərqlidir:
"Yəni elə bir ərazi yoxdur ki, o əraziyə bir tərəfdən Rusiya qazı gəlsin, digər tərəfdən Azərbaycan qazı gəlsin. Rusiyanın"Vygon Consulting"adlı rus şirkətinin araşdırması Rusiyanın qaz ixrac etdiyi ümumi ərazilərə aiddir. Yəni söylənilən o təhlükə Azərbaycanın qaz kəmərlərinə və onun tədarük etdiyi ərazilərə aid deyil. Ola bilsin ki, bu qaz ehtiyatlarının çoxalması yayda Rusiya qazının qısamüddətli ucuzlaşmasına gətirib çıxara bilər. Amma hər halda bu bir proqnoz və hesablamalardır. Çünki Azərbaycanın qaz ixrac etdiyi ərazilərdə belə bir problem yoxdur. Bizim qaz satdığımız ölkələrin qaz ehtiyatı yaratmaq tələbatı yoxdur. Çünki,bizim kəmərlərdə "Vygon Consulting"adlı rus araşdırma şirkətinin dediyi təhlükə mövcud deyil. Bu səbəbdən də bizim alıcıların anbarlarında deyilən qədər qaz ehtiyatları toplanmayıb. Bu sadəcə müəyyən qədər yay mövsümündə qazın ucuzlaşmasına gətirib çıxara bilər. Qaz tədarükçüləri yay mövsümündə qarşıdakı qışı qarşılamaq üçün öz işini planlaşdıraraq yayda daha çox ehtiyat qaz tədarük edirlər. Ona görə də qazın qiyməti yayda stabil olur. Bu baxımdan rus şirkətinin hesablama və proqnozlarını ciddi hesab etmirəm. Ümumiyyətlə dünya bazarında qazın qiyməti qarşıdakı aylarda o qədər də ucuzlaşa bilməz. Qeyd edim ki, 5-10 dollar ucuzlaşsa belə, ciddi ucuzlaşmadan söhbət belə gedə bilməz. Bu da Azərbaycanın birbaşa seqmentinə çox az təsir edə bilər".

Fəridə Ağazadə

Telegramda izləyin

instagramda izləyin