"DİN-in əlində insanların aldadılması ilə bağlı kifayət qədər məlumat var"-Osman Gündüz
Son ayların ən aktual məsələlərindən biri bildiyimiz kimi sosial şəbəkələrdə qarşımıza çıxan hansısa reklam, oyun və ticari dəvətlərdən gələn təhlükələrdir. Sözsüz ki, bir çox sosial şəbəkə istifadəçisi hansısa yollarla belə oyunların qurbanına çevrilib. Məlumatların oğurlanması, mobil telefona yüklənən oyun xararakterli proqramların təhlükəsi günü-gündən artmaqddır.
Məhz bu məqsədlə Azərbaycan Respublikası Daxili İşlər Nazirliyi (DİN) sosial şəbəkə istifadəçilərinə rəsmi şəkildə xəbərdarlıq edib. Belə ki, Nazirlik son günlər sosial şəbəkələrdə, xüsusən İnstagram platformasında müəyyən ödəniş qarşılığında vətəndaşlara guya internet xidmətləri göstərən səhifələrin sayının artdığını açıqlayıb. Qeyd edilir ki, səhifə adminləri izləyicilərinə sosial şəbəkə hesablarının şifrələrini qırmaq və ya başqa bir şəxsin mesajlarını izləmək kimi vədlər verir. Nəticədə insanlar üçün təhlükələr yaranır.
Bununla bağlı Sonxeber.az-a danışan Multimedia İnformasiya Sistemləri Texnologiyaları Mərkəzinin rəhbəri Osman Gündüz adıçəkilən problemə aydınlıq gətirib. Son dövrdə Azərbaycanda sosial medianın, internetin kommersiya tərəfinin getdikcə gücləndiyini qeyd edən mütəxəssis insanların məhz sosial media-instaqram, feysbuk üzərindən kommersiya qurmağa, gəlir götürməyə maraqlı olduğunu açıqlayıb:
"Bu tendensiya getdikcə sürətlənir. İnstaqramın biznes yönümü, çəkisi artmaqdadır. Burada kommersiya məqsədi gücləndikcə insanların aldadılması, dələduzluq, onların inam və etibarından sui-istifadə etməyə cəhd edənlər getdikcə artır. Daxili İşlər Nazirliyinin açıqlaması bu tendensiya ilə əlaqədardır. Düşünürəm ki, Daxili İşlər Nazirliyinin əlində insanların aldadılması ilə bağlı kifayət qədər məlumatlar var.
İlk növbədə dələduzluq, hüquq pozulmalarının qarşısının alınması üçün vətəndaşlar birinci özlərinin təhlükəsizlik qayğısına qalmalıdırlar. Yəni birinci özləri bunun fərqində olmaldırlar".
Osman Gündüz bildirib ki, kommersiya məqsədilə istifadə edilən dələduzluqdan əlavə xanımların səhifələrinə də müxtəlif məqsədlər üçün girişlər olunur:
"Belə xanımlar bu cür cəlbedici reklamlara, hansısa cəlbedici xidmətlərə, alqı-satqı məsələlərinə bir qədər ehtiyatla yanaşmalıdırlar. Başqalarına da belə təzyiqlər varmı deyə axtarış verməlidirlər".
Osman Gündü həmçinin əlavə edib ki, əgər insanların, xüsusən də zərif cinsin nümayəndələri olan xanımlarımızın məlumatları, instaqram hesabında olan fotoları oğurlanırsa, mütləq lazımı orqanlara məlumat verməlidirlər:
"Dövlətin bununla bağlı qurumları var, hansı ki, adıçəkilən məsələ ilə birbaşa məşğul olur. Nəqliyyat, Rabitə və Yuksək Texnologiyalar Nazirliyinin yanında Elektron Təhlükəsizlik Xidməti, Daxili İşlər Nazirliyinin də özünün və bununla məşğul olduğu qurumları var. Əgər kriminal hadisə baş veribsə, artıq insanlar hüquq-mühafizə orqanlarına müraciət edə bilərlər. Yəni fərdi məlumat, hesab oğurlanıbsa bu artıq cinayət işi sayılır. Əgər profilaktiki işlərə, informasiya metodiki-dəstəyə ehtiyac varsa, nəsə tədbir görülməlidirsə Rabitə və Yuksək Texnologiyalar Nazirliyinin yanında Elektron Təhlükəsizlik Xidmətinin qaynar xəttinə müraciət edib, dəstək ala bilərlər".
Şəlalə Babayeva
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş