"Livayada Fransa və Almaniya birbaşa Rusiyanın mövqeyini müdafiə edir" - RƏY

Son vaxtlar Rusiya və Avropa Birliyi arasındakı münasibətlərdə müəyyən istiləşmə təzahürləri özünü büruzə verir. Rusiya Xarici İşlər Nazirliyinin Ümumavropa Əməkdaşlığı Departamentinin direktoru Nikolay Kobrinets yeni Avropa Komissiyasının yaradılmasından sonra "imkanlar pəncərəsinin" açılması barədə bəyanat verib. Ümidverici hal kimi o, Rusiya prezidenti Vladimir Putin və Avropa Komissiyasının yeni sədri Ursula fon der Leyen arasında görüş və telefon söhbətinin baş verməsini göstərib. Eyni zamanda RF-nin AB yanında daimi nümayəndəsi Vladimir Çijov Avropa Birliyi tərəfindən əsasən Ukrayna böhranı ilə bağlı Rusiyaya qarşı sanksiyaların tədbiqinin səmərəsizliyini dərk etməsindən məmnunluğu ifadə edərək Brüsselin diqqətini ümumi siyasi və iqtisadi maraqların, eləcə də iki tərəf üçün terrorizmdən tutmuş yeni koronavirusa qədər ümumi təhlükələrin olmasına cəlb etdi.Yeri gəlmişkən, son vaxtlar qüdrətli Avropa dövlətlərindən biri olan Fransa Rusiya ilə qarşıdurmanın aradan qaldırılmasının məqsədəuyğunluğu barəsində konkret işarələr vermişdir.Bütün bunları nəzərə alaraq, Rusiya ilə Avropa Birliyi arasında gərginliyin aradan qaldırılmasını mümkün hesab etmək olarmı? Qlobal siyasətdə baş verən digər mühüm proseslər fonunda bu mümkün "Rusiya-Avropa istiləşməsi" iki tərəfin ənənəvi təsir sahələrinə, o cümlədən postsovet məkanı və konkret olaraq Cənubi Qafqaz bölgəsinə nələr vəd edə bilər?

Bununla bağlı Sonxeber.az-a danışan Siyasi İnnovasiya və Texnologiya Mərkəzinin (SİTM) sədri Mübariz Əhmədoğlu bildirib ki, Rusiya həmişə çalışıb ki, onlara Avropa Birliyinin tərkib hissəsi kimi baxılsın: "Çar Rusiyası Avropanın yarısına kimi gedib çıxdı. Amma avropalılar ruslara özlərinin tərkib hissəsi kimi baxmadılar. SSRİ dövründə elm, texnika çox güclü inkişaf etmişdi. Hətta SSRİ ikinci dünya müharibəsi dövründə Avropanın xilaskarı kimi çıxış etdi. Amma yenə də ruslar Avropa sivilizasiyasının tərkib hissəsi kimi qeyd edilmədi. Amma bu tezizi bu yaxınlar səsləndirildi. Belə ki, ötən ilin sonlarında Putin Fransaya səfər etdi. Səfər zamanı Fransanın prezidentinin Putinlə görüşü zamanı ən əsas teziz rusların Avropa sivilizasiyasının tərkib hissəsi barəsində oldu. Emmanuel Makron bildirdi ki, Rusiya ilə Avropa eyni sivilizasiyanın tərkib hissələridir. Hazırda Avropa İttifaqının liderləri ilə Rusiyanın rəhbərliyinin münasibətini siyasət, hərbi güc və iqtisadiyyatla əlaqələndirmək çox cüzi bir məsələdir. Avropada Rusiyaya çox isti münasibət var. Livayada Fransa və Almaniya birbaşa Rusiyanın mövqeyini tutub Türkiyənin əleyhinə gedirlər. Uzun müddətdir ki, Türkiyə onlarla birlikdə NATO-nun üzvdür. Amma onlar Rusiyanın tərəfini tuturlar. Hesab edirəm ki, Putinin kursu davam etsə, o zaman Avropa Rusiya ilə yaxın olacaq. Rusiya dünyanın qaz, neft və meşə nəhəngidir. Nə qədər lazımdırsa, Rusiya Avropanın ehtiyaclarını ödəmə imkanındadır. Avropa da bunu görür. Strateji təhlükəsizlik məsələsində də onların bir yerdə olması imperativə çevirir. Bu da o deməkdir ki, Avropa Birliyi ilə Rusiya münasibətlərində heç bir geriləmə olmur".

Aysel Yusifqızı

Telegramda izləyin

instagramda izləyin