"BƏƏ-nin AES tikməsində əsas məqsədi İrana qarşı siyasi platforma əldə etməkdir"-RƏY

Ərəb ölkələrində ilk nüvə stansiyası Birləşmiş Ərəb Əmirliklərində inşa olunacaq. Artıq BƏƏ Federal Nüvə Müfəttişliyi İdarəsi ilk nüvə stansiyasının 1 saylı reaktorunun inşasına icazə verib. Nüvə stansiyasınə Koreya Elektrik Enerjisi Şirkəti (KEPCO) inşa edib.
BƏƏ-də nüvə stansiyasının tikintisi ilə bağlı tender 2009-cu ildə elan olunub və Əmirliklər Nüvə Enerji Şirkətinin (ENEC) elan etdiyi tenderdə KEPCO qalib gəlib. Layihəyə əsasən Əbu Dabidən 270 kilometr qərbdə "APR-1400" tipli 4 reaktorlu nüvə stansiyası inşa olunub.
BƏƏ rəhbərliyi nüvə stansiyasının yaxın 50 ildə enerji ehtiyaclarının təminat altına alınması kimi qiymətləndirir.
Nüvə stansiyası neft və qaz ehtiyatları ilə zəngin ərəb ölkələri üçün nə qədər vacibdir? Bu layihə region üçün əlavə risk yaradırmı? İranın nüvə stansiyası dünya üçün ciddi risk yaratdığı bir zamanda bir ərəb ölkəsində nüvə reaktorunun işə salınması hansı riskləri yarada bilər?

Mövzu ilə bağlı politoloq Məhəmməd Əsədullazadə Sonxeber.az-a açıqlama verib. O, bildirib ki, Körfəz ölkələrinin neft-qaz yataqlarının zəngiliyinə fikir versək, bu ölkənin enerji üçün alternativ variantlardan istifadə etməsi əsasən siyasi məqsədlərdən qaynaqlanır:
"Körfəz ölkəsi olan BƏƏ-nin Atom Elektrik Stansiyası tikməsində əsas məqsədi burada İrana qarşı bir siyasi platforma əldə etməkdən ibarətdir. BƏƏ regionda ABŞ-ın müttəfiqi olaraq Yaxın Şərqdə İrana qarşı ciddi bir siyasi cəbhədə, yəni öndə yer alır. Hesab edirəm ki, BƏƏ-nin nüvə enerjisinə sahib olması Körfəzdə İranın mövqelərinin gələcək perspektivdə zəifləməsinə gətirsə də, bu regionda ciddi təhlükəsizlik problemlərinə yol aça bilər. BƏƏ bir çox hallarda terror təşkilatlarının maliyyələşməsini həyata keçirir. Belə bir nüvə stansiyasının bu ölkədə tikilməsi nüvə silahının əldə olunmasına və bu da terror təşkilatlarının əlinə keçməsinə gətirə bilər. Onu da qeyd edim ki, İsrail və ABŞ BƏƏ-nin nüvə silahı əldə etməsinə dəstək verir".

Fəridə Ağazadə

Telegramda izləyin

instagramda izləyin