"Avropa ölkələri Rusiya ilə siyasi və iqtisadi münasibətləri gücləndirməyə çalışır"- RƏY
Almaniya Bundestaqının "Sollar" fraksiyası Almaniya hökumətini ölkənin NATO-nun aprel-may aylarında keçiriləcək "Defender Europe 2020" ("Avropanın müdafiəçisi 2020") hərbi təlimlərində iştirakı zamanı Rusiya sərhədlərinə yaxın zonada alman qoşunlarını yerləşdirməməyə çağırdı. Müraciətdə qeyd olunur ki, NATO-nun Rusiya sərhədləri zonasında, Baltikyanı dövlətlərin ərazisində 40 minlik hərbi qüvvələrin təlimlərini keçirməsi faşizm üzərində qələbənin 75 illiyi ərəfəsində Rusiyada ve keçmiş SSRİ respublikalarında yaşayan insanların hissini təhqir edə bilər. Alman sollarının NATO-nun hərbi təlimləri ilə bağlı mövqeyi ümumən Avropada Rusiya ilə qarşıdurmanın aradan qaldırılması ideyasının tərəfdarlarının getdikcə çoxalmasının göstəricisi kimi qəbul edilə bilər. Qərbi Avropanın, o cümlədən Almaniyanın, bir sıra siyasi qüvvələri Rusiya ilə münasibətlərdə qıcıqlandırıcı rol oynayan NATO-nun Rusiya sərhədlərinə yaxın bölgələrdə, ilk növbədə Baltikyanı dövlətlərdə, hərbi mövqelərinin güclənməsinə ehtiyatla yanaşmağı məsləhət görür. Hətta Avropa ilə Rusiya arasında münasibətlərin yaxşılaşdırılması zərurəti bəzi Avropa dövlət başçıları, məsələn Fransa prezidenti Emmanuel Makron tərəfindən dəfələrlə qeyd edilmişdir.Aparıcı Avropa ölkələrinin Rusiya ilə dialoqu böhran vəziyyətindən çıxarmaqda maraqlı olduğu barədə fikir söyləmək olarmı? Bu məsələnin bütün postsovet məkanında cərəyan edən geosiyasi proseslər kontekstində əhəmiyyəti nələrdir?
Bununla bağlı Sonxeber.az-a danışan "Atlas" Araşdırmalar Mərkəzinin rəhbəri Elxan Şahinoğlu bildirib ki, 2014-cü ildə Ukraynada müharibə başladıqdan sonra Rusiya Krımı ilhaq etdi və sonra Amerika ilə yanaşı Avropa ölkələri də ona qarşı sanksiyalar tədbiq etməyə başladı:
"Rusiya ciddi tənqid edildi. Amma üstündən 5-6 il keçsə də, Avropanın aparıcı ölkələri, eləcə də Almaniya, Fransa ilə Rusiyanın münasibətlərində yumşalma gedir. Fransa prezidenti Makron deyir ki, Rusiya ilə yenidən dostlaşmaq lazımdır. Rusiyasız Avropa mümkün deyil. Almaniya Kansleri Angela Merkel 5 ildən sonra yenidən Rusiyaya səfər etdi. Amerikadan fərqli olaraq Rusiya ilə barışmağa çalışdılar. Ukraniyana məsələsi və Krımın ilhaqı Fransa və Almaniya üçün arxa plana keçməyə başlayıb. Rusiya ilə siyasi və iqtisadi münasibətləri gücləndirməyə çalışırlar".
Aysel Yusifqızı
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş