"Bu gün Azərbaycanda yoxsulluq 5%, işsizlik 4.9% təşkil edir"-RƏY
2007-ci ildə BMT Baş Assambleyası 20 fevralı Ümumdünya Sosial Ədalət günü elan edib. 2009-cu ildən bu yana hər il qeyd olunan bu beynəlxalq tarix 2008-ci il Beynəlxalq Əmək Təşkilatının (BƏT) "Ədalətli qloballaşma məqsədilə sosial ədalət haqqında Bəyannamə"sində əks olunan prinsiplərin həyata keçirilməsini nəzərdə tutur.
Azərbaycanın BMT bəyannamələrini tam dəstəklədiyini və sosial ədalətin təmin edilməsinə və bərabərsizliyin aradan qaldırılmasına yönəlmiş məsələlərdə BƏT ilə fəal əməkdaşlıq etdiyini qeyd etməklə materialın hazırlanması tövsiyə edilir.
Son illərdə məşğulluğun təmin edilməsi, əhalinin sosial cəhətdən müdafiəsiz kateqoriyalarının müdafiəsi, minimum əmək haqqı, sosial müavinətlərin, pensiyaların, şəhid ailələrinə verilən ödənişlərin və s. artımı üzrə görülən işlər barədə Sonxeber.az-a deputat Aydın Mirzəzadə danışıb.
O, bildirib ki, sosial ədalət bəşəriyyətin can atdığı və təmin etməyə çalışdığı bir məsələdir:
"Azərbaycan dövlət müstəqilliyini təmin edəndən, xüsusilə də ulu öndər Heydər Əliyev hakimiyyətə gələndən sonra bu məsələ dövlətçiliyimizin, inkişafımızın əsas məsələsi oldu. Ulu öndərin o dövrdə cəmiyyətdə stabilliyi təmin etməsi, vətəndaş müharibəsi təhlükəsini aradan qaldırması da sosial ədalət istiqamətində çox vacib məsələ idi. Daha sonra Avropa dəyərlərinin, inkişaf etmiş ölkələrinin göstəricilərinin tədricən Azərbaycana gəlməsi üçün çox ciddi addımlar atılıb. Vaxtı ilə Azərbaycanda yoxsulluğun həddi 49% idisə, hazırda 5%-ə düşüb. Bu gün işsizliyin səviyyəsi ölkədə 4.9%-dir. Minimum əmək haqqının, minimum pensiyaların artması istiqamətində çoxlu işlər görülür. Yəni, bütün bunların hamısı vətəndaşlarımızın daha yaxşı yaşaması üçün görülən işlər hesab edilə bilər. Əlbəttə ki, hələ də minimum əmək haqqımız arzu olunduğu səviyyədə deyil. Amma buna çatmaq üçün ciddi addımların atıldığı, iş yerlərin açıldığı, infrastrukturun yeniləndiyi göz qarşısındadır. Sosial ədalətin vacib məsələlərindən biri də istedadlı insanların irəli çəkilmə mexanizminin hazırlanmasıdır. Dövlət qulluğuna və tələbələrin Ali məktəblərə qəbulunda test sisteminin həyata keçirilməsi sosial ədalətin təmin edilməsinə gətirib çıxarıb. Bu gün Azərbaycanda demək olar ki, 100% faiz uşaq və gənclər təhsillə əhatə edilibdir. Hazırda Tibbi Sığortanın tətbiq edilməsi insanların daha keyfiyyətli tibbi xidmət almasına kömək edəcəkdir. İnsan hüquq və azadlıqlarının qorunması da cəmiyyətin əsas məsələlərindən hesab edilə bilər. Əlbəttə, bu gün 1.2 milyon vətəndaşımızın Ermənistanın işğalı nəticəsində məcburi köçkün düşməsi sosial ədalətin kobudcasına pozulmasıdır. Bunun aradan qaldırılması üçün Azərbaycan dövləti böyük səylər göstərir. Ümumiyyətlə, dünyada sosial ədalətin əhatə etdiyi bütün sahələrin Azərbaycanda olması, möhkəmlənməsi və daha da yüksəlməsi indiki iqtidarın əsas vəzifələrindəndir. Hesab edirəm ki, bu istiqamətdə ildən-ilə nəticələrimiz daha da yaxşılaşacaq".
Fəridə Ağazadə
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş