Bu gün Dağlıq Qarabağ münaqişəsinin rəsmi tarixinin başlanğıcıdır-Politoloq rəyi

1988 - ci ilin bu günü Azərbaycan SSR-in Dağlıq Qarabağ Muxtar Vilayətinin (DQMV) Xalq Deputatları Sovetinin erməni deputatları qeyri-legitim növbədənkənar sessiya çağıraraq "Dağlıq Qarabağın Azərbaycanın tərkibindən çıxarılıb Ermənistana verilməsi haqqında" qərar qəbul ediblər. Bu barədə SSRİ Ali Sovetinə müraciət qəbul olunub. DQMV-nin Xalq Deputatları Sovetinin mandatı 1988-ci ilin yanvarında bitmişdi və ermənilərin qəbul etdiyi qərar qeyri-legitim idi. Bu hadisə Qarabağ münaqişəsinin rəsmi tarixinin başlanğıcı hesab olunur.

Mövzu ilə bağlı politoloq Elxan Şahinoğlu Sonxeber.az-a danışıb. O, bildirib ki, həmin tarix separatçıların başlatdığı tarixdir:
"Onlar mitinqlər təşkil edərək separatçı tələblər irəli sürdülər. Bu, Azərbaycan qanunlarına da zidd idi. Eyni zamanda, Qarabağda yaşayan azərbaycanlılar da nəzərə alınmırdı. Məhz bundan sonra etnik təmizləmələr, silahlı toqquşmalar, Ermənistandan azərbaycanlıların qovulması prosesi başladı. Yəni, başlanğıc nöqtə o idi. Amma həmin günə qədər aydındır ki, Dağlıq Qarabağda hazırlıqlar gedirdi. Mən özüm də əslən qarababağlıyam. Xatırlayıram, valideynlərimiz danışırdı ki, 1970-ci illərdə 1980-ci illərin əvvəllərində müəyyən separatçı meyilləri o hissələrdə var idi. Müəyyən işlər görürdülər, imzalar toplanırdı. Bu prosesə çoxdan başlamışdılar, sadəcə münbit mühitdən istifadə edərək Mixayıl Qorbaçovun başlatdığı yenidənqurma siyasətindən öz məqsədləri üçün istifadə edərək 1988-ci ilin 20 fevral tarixində ilk mitinqlərini etdilər və bütün bəlalar da bundan sonra başladı. Əlbəttə, mitinqlər və tələblər qeyri-legitim idi. Hətta, o zaman Moskva ermənilərə simpatiya ilə yanaşsa da, onlar da hesab etdilər ki, Dağlıq Qarabağda yaşayan ermənilər Azərbaycanın rəyi olmadan bu addımı ata bilməzlər. Amma çox təəəssüf ki, sonrakı illərdə elə məhz Sovet hakimiyyəti rəhbərliyi həmin o separatizmə meyillənən şəxslərə gizli yollarla dəstək verdi. Separatçılar Dağlıq Qarabağda, Xankəndində olan Sovet hərbi bazalarından silahlar əldə etdilər. Bununla da proseslər başladı və 32 ildir bu məsələ də görürürük ki, həll olunmur".

Fəridə Ağazadə

Telegramda izləyin

instagramda izləyin