"İtaliya prezidenti Azərbaycanı strateji tərəfdaşı elan etdi və Qarabağ probleminin həllini açıq şəkildə dəstəklədi"- RƏY

Bildirilir ki, Paşinyan Ermənistan İctimai Televiziyasına müsahibə verib. O müsahibəsində "ekspertlərin dar çərçivədə Qarabağ məsələsinin incəlikləri ilə tanış olduğu vaxtlar keçmişdə qaldı"- deyib. Həmçinin "mühüm məqamın yarandığını - Qarabağ məsələsində yeni danışıqlar məzmununun formalaşdığını" qeyd edərək, onu "Münhen prinsipləri" adlandırıb.

Məlumdur ki, Qarabağ münaqişəsinin nizamlanması hələ də ATƏT-in Minsk Qrupunun himayəsindədir və Paşinyanın Münhen görüşündən sonra aldığı sillə hələ də təsirini göstərməkdədir.

Mövzu ilə bağlı Sonxeber.az-a danışan politoloq Qabil Hüseynli Paşinyanın özünü və hərəkətlərini anormal olaraq dəyərləndirib:

"Mən burada konseptual heç nə görmürəm. Yəni, Paşinyan anormal bir insandır. O gündə ağlına gələn bir sözü işlədir. Bu məsələdə dünya dövlətləri, BMT-nin qətnamələri, ATƏT-in Minsk qrupunun yanaşması var. Paşınyanın dedikləri ilə heç nə mümkün olmayacaq və nəhayət o, danışıqlar prosesinə əngəllər yaradacaq. Bu zaman isə müharibə variantı rellaşacaq".

Politoloq vurğuladığı məqamların reallaşacağını qeyd edərkən Ermənistanın müharibəyə gücünün yetməyəcəyini də vurğulayıb:

"Ermənistan müharibəyə hazır deyil. Məsələnin həlli ilə bağlı isə dünyanın mövqeyində çox ciddi dəyişikliklər yaranıb. Yəni, Avropa Birliyi, Avropa Şurası, BMT, ayrı- ayrı ölkələr problemi Azərbaycanın ərazi bütövlüyü çərçivəsində həll etməyi tələb edirlər. Bilirsiniz ki, Azərbaycan Prezidenti İlham Əliyev İtaliyada rəsmi səfərdədir. İtaliya prezidenti Azərbaycanı özünün strateji tərəfdaşı elan etdi. Bu, çox böyük uğurdur. İtaliya prezidenti Qarabağ probleminin Azərbaycanın ərazi bütövlüyü çəçivəsində öz həllini tapmalı olduğunu açıq sürətdə bildirdi. Bunu Almaniya, hətta ermənilərə yaxın olan fransızlar da belə deyir. Avropa Parlamenti bu barədə bir neçə dəfə bəyanat yayıb. Avropa Şurası bu fikri çoxdan təsdiqləyib. NATO-nun Zirvə toplantılarında Dağlıq Qarabağa dair ayrıca bəyanatlar qəbul edilib. Həmin bəyanatlar da Postsovet məkanındakı bütün münaqişələrin, o cümlədən də Dağlıq Qarabağın ərazi bütövlüyü çərçivəsində həll etməyi tələb edir".

Şəlalə Babayeva

Telegramda izləyin

instagramda izləyin