Düşmən dəyirmanına su tökənlər və ya oturduğu ağacı baltalayanlar
Son günlər erməni KİV-lərində ehtiyatda olan azərbaycanlı polkovnik Qəhrəman Mənsimzadənin videomüraciəti tirajlanır. Videomüraciətində ehtiyatda olan polkovnik Azərbaycan ordusu, Müdafiə nazirliyi barədə müxtəlif fikirlər səsləndirib, ittihamlar irəli sürüb.
Bunu isə düşmən mətbuatı fürsət kimi qəbul edərək, əllərində bayraq ediblər və informasiya savaşına başlayıblar. Uzun illər hərbi forma geyən, düşmən barədə bizdən çox məlumatı olan bir şəxsin belə bir addımı, addımının nəticələrini əvvəldən görərək belə bir işə imza atması hələ də qaranlıq qalıb.
Əzizlərim, unutmayaq ki, biz ermənilərlə təkcə səngərdə üz-üzə dayanmamışıq. Biz ermənilərlə həm siyasi arenada, həm mətbuatda, həm mədəniyyət sahəsində, həm də bir çox sahədə üz-üzə dayanmışıq. Ölkə daxilində baş verən istənilən neqativ hal düşmən tərəfi sevindirir, adi bir xəbəri də tirajlayaraq toy-bayram edirlər.
Belə bir informasiya savaşı gedən dövrdə erməni dəyirmanına su tökmək nə dərəcədə doğrudur? Ölkə rəhbəri Münhen şəhərində Paşinyana tarix dərsi verir, məntiq və zəkası ilə darmadağın edir, biz nə edirik?
Nə vaxta qədər vəzifədən çıxan, işdən çıxarılanlar erməni dəyirmanına su tökməyə davam edəcəklər? Niyə bu insanlar bir dəfə özlərinə sual vermirlər ki, mənim tirajladığım ittihamları düşmən mediası sevə-sevə manşetlərə çıxaracaq, Azərbaycan əleyhinə istifadə edəcək, müxtəlif dillərə tərcümə edib xarici KİV-lərə ötürəcək, "baxın, Azərbaycan Ordusu bu gündədir, Azərbaycan Müdafiə nazirliyi bu vəziyyətdədir" deyərək ənənəvi erməni şivənliyi qoparacaqlar.
Yenə yuxarıdakı fikrimə qayıdıram, ölkə başçısı müxtəlif arenalarda erməniləri mat vəziyyətinə qoyur, savadsız, məntiqsiz olduqlarını üzlərinə vurur, tarixi faktları bir-bir sadalayır, ermənilərin işğalçı olduqlarını öz dilləri ilə sübuta yetirir. Belə bir durumda, belə xəbərlərin tirajlanması nə dərəcədə doğrudur? Belə bir durumda, belə xəbərlərin KİV-lərə ayaq açması hansı məqsədlərdən xəbər verir?
Gəlin, bir anlıq düşünək, reallıq hissimizi itirməyək. Azərbaycan Ordusu və Azərbaycan Əsgəri müqəddəsdir! Onu qorumaq, ona hörmət etmək, tərəfini tutmaq, əl içində gəzdirmək hər birimizin borcudur!
Ey Qəhrəman kimilər, siz isti kabinetlərinizdə, isti evlərinizdə yatanda, klaviatura arxasına keçib ittihamlar səsləndirəndə, məhz Azərbaycan Əsgəri səngərdə 24 saat gözünü qırpmadan düşmənlə üz-üzə dayanır! Sizin kimi insanların çamur atdığı Azərbaycan Əsgəri, Azərbaycan Ordusunun nümayəndələri canından-qanından keçir! Nəşi Bayrağımıza bükülərək torpağa tapşırılır! Bir anlıq reallıq hissinə qayıdın, bunları düşünün!
Bəsdir, erməni dəyirmanına su tökdüyünüz!!!
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş